රංජන් කස්තුරි

ආරක්ෂක අංශයේ ඉහළ නිලධාරියකු අත්අඩංගුවට ගැනීමේ සුදානමක් පිළිබඳව හා රජය රණවිරුවන් දඩයම් කරන බවට විපක්ෂය නගන චෝදනා බරපතල හා සාවද්‍ය එකකැයි රජය නිවේදනයක් නිකුත් කරමින් සඳහන් කරයි.

පුද්ගලයින් පැහැර ගැනීමේ සිද්ධියක් සම්බන්ධයෙන් ආරක්ෂක මාණ්ඩලික ප්‍රධානීගෙන් කරුණු විමසීම රණවිරු දඩයමක් වන්තේ කෙසේදැයි විමසිය යුතුව තිබෙන බවද එම නිවේදනයේ සඳහන්වේ.

රජයේ ප්‍රවෘත්ති අධක්ෂ ජනරාල් සුදර්ශන ගුණවර්ධන මහතා නිකුත් කළ එම නිවේදනයේ මෙසේද සඳහන් වේ.

   ‘‘පසුගිය දිනවල විපක්ෂය සහ ඔවුන්ගේ මතය සමාජගත කිරීමේ කාර්ය ඉටුකරමින් සිටින විවිධ පුවත්පත් මෙන්ම විද්‍යුත් මාධ්‍ය හරහා ආරක්ෂක අංශයේ ඉහළ නිලධාරියකු අත්අඩංගුවට ගැනීමේ සුදානමක් පිළිබඳ දැඩි ප්‍රචාරයක් ලබාදෙමින් වත්මන් රජය රණවිරුවන් දඩයම් කරන බව මතයක් නිර්මාණය කිරීමට උත්සහ ගනිමින් තිබේ.

මේ සම්බන්ධයෙන් කරුණු පැහැදිගි කිරීමක් කළයුතුව ඇත.මන්ද වත්මන් රජය පත්වූ දා සිට මේ දක්වා ආරක්ෂක අංශවලට හෝ එහි නිලයන්ට කිසිදු ආකාරයක බලපෑමක් හෝ අයුතු චෝදනාවක් හෝ සිදුකොට නොමැති පසුබිමක් තුල වත්මන් රජයට එල්ලවල මේ චෝදනාව බරපතල සහ සම්පුර්ණ සාවද්‍ය එකක් වන බැවිනි.

2009 මැයි 28 දින එවකට නාවුක හමුදාපති වසන්ත කරන්නාගොඩ මහතා විසින් කොළඹ අපරාධ කොට්ඨාසයට කරන ලද පැමිණිල්ලක්  අනුව එදා හිටපු පොලිස්පතිවරයාගේ නියෝග මත 2009 සැප්තැම්බර් 10 දින අපරාධ පරීක්ෂණ දෙපාර්තමේන්තුවේ විශේෂ අංශය විසින් ඒ සම්බන්ධයෙන් විමර්ශන කටයුතු ආරම්භ කර ඇත.

එම පරීක්ෂණ  ආරම්භ කළේ මහින්ද රාජපක්ෂ පාලන සමයේදීය.නමුත් සිය පාලනයට අවාසිදායක යැයි හැගෙන ඇතැම් කරුණු හෙළිදරව් වීමේ පසුබිම තුළ පරීක්ෂණ කටයුතු ක්‍රමයෙන් අක්‍රීය කිරීමට එදා පාලකයන් පසුබට නොවුණි.එවැනි පසුබිමක් තුළ ලංකාවේ පමණක් නොව ජාත්‍යන්තරයේදී මෙම අතුරුදන් කිරීමේ සිද්ධිය පිළිබඳව බරපතළ කතිකාවක් නිර්මාණය විය.

ඒ අනුව නැවත පරීක්ෂණ කටයුතු ආරම්භ කරන බවට එදා පැවැති රජය ජාත්‍යන්තරය ඉදිරියේ පොරොන්දුවක් ලබා දුන්නේය.එකී පොරොන්දුව ප්‍රකාරව 2014 අප්‍රේල් මස නැවත පරීක්ෂණ කටයුතු ආරම්භ කළේය.

ඒ අනුව අතුරුදන් කිරීම් පිළිබඳ විමර්ශණ කටයුතු සිදුකිරීමේ දී එහි ප්‍රධාන සැකකරුවන් ලෙස හදුනාගෙන ඇත්තේ නාවික හමුදාවේ ලුතිනන් කමාන්ඩර් සම්පත් මුණසිංහ හා ලුතිනන් කමාන්ඩර් හෙට්ටිආරච්චි මුදියන්සේලාගේ ප්‍රසාද් චන්දන හෙට්ටිආරච්චි හෙවත් නේවි සම්පත් යන අයවලුන්ය.

ලුතිනන් කමාන්ඩර් සම්පත් මුණසිංහ යන අය අත්අඩංගුවට ගෙන පසුව ඇප මත නිදහස් කර ඇති නමුත් නේවි සම්පත් යන අය පසුගිය කාලය පුරා අධිකරණය මගහැර සිටියේය.ඔහු 2018 අගෝස්තු 13 දින අත්අඩංගුවට ගන්නා ලදී.

නේවි සම්පත් යන අයට අධිකරණය මගහැර සිටීමට සහ හෝ අත්අඩංගුවට පත්වීමෙන් වළක්වා ඔහුට රැකවරණය දීම සම්බන්ධයෙන් චෝදනා එල්ල වී ඇති ආරක්ෂක මාණ්ඩලික ප්‍රධානී වයිස් අද්මිරාල් රවි විජේගුණරත්න මහතාට ඒ සම්බන්ධයෙන් ප්‍රකාශයක් ලබාදෙන ලෙස ඉල්ලා අපරාධ පරීක්ෂණ දෙපාර්තමේන්තුව විසින් 2018.09.02 දාතම ලිපියක් මගින් දැනුම් දී තිබේ.

නමුත් මේ සම්බන්ධයෙන් විවිධ පුද්ගලයන් සහ මාධ්‍ය විසින් ප්‍රචාරය කර තිබුණේ  ආරක්ෂක මාණ්ඩලික ප්‍රධානී අත්අඩංගුවට ගැනීමට සුදානමන් පවතින බවය.එවැනි කිසිදු සුදානමක් හෝ අවශ්‍යතාවක් අපරාධ පරීක්ෂණ දෙපාර්තමේන්තුවට නොතිබිණි.

පුද්ගලයින් 11 දෙනා පැහැරගැනීමේ විමර්ශනය 2009 සැප්තැම්බර් 10 දින ආරම්භ කළ පරීක්ෂණයක් බවත් වත්මන් ආණ්ඩුව ආරම්භ කළ පරීක්ෂණයක් නොවන බවත් සිහිකැඳවිය යුතුය.එසේ තිබියදී එම පරීක්ෂණයේ ඉදිරිකටයුතු පවත්වා ගෙන යාම සඳහා ආරක්ෂක මාණ්ඩලික ප්‍රධානී වයිස් අද්මිරාල් රවී විජේගුණරත්න මහතාගේ කරුණු විමසීමක් සිදු කිරීම රණවිරු දඩයමක් වන්නේ කෙසේදැයි විමසීය යුතුව ඇත.‘‘