වෛද්‍යවරුන්ගේ අනතුරු ඇඟවීම් නොතකමින් ‘කොවිඩ්-19’ ආසාදනය වීම වළක්වා ගැනීමට ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප් මැලේරියා නාශක ඖෂධයක් වන ‘හයිඩ්‍රොක්සික්ලෝරෝක්වීන්’ භාවිතයට ගන්නා බව විදෙස් මාධ්‍ය වාර්තා කරයි.

ඇමෙරිකානු ජනාධිපතිවරයා උපුටා දක්වමින් විදෙස් මාධ්‍ය ඒ බව වාර්තා කර තිබිණි. තමන් වයිරසය ආසාදනය වීමෙන් වැළැකීම සඳහා දිනකට මැලේරියා පෙත්තක් ගන්නා බව ඇමෙරිකානු ජනාධිපතිවරයා ධවල මන්දිරයේදී පැවැසීය.

ලොක්ඩවුන් තහංචි ලිහිල් කරමින් ඇමෙරිකාව යළි විවෘත කරන ආකාරය සම්බන්ධයෙන් ඇමෙරිකාවේ ප්‍රධාන පෙළේ අවන්හල් හිමිකරුවන් හමුවී සාකච්ඡා කරමින් ඇමෙරිකානු ජනාධිපතිවරයා ඒ බව කීවේය. එම අවස්ථාව ආවරණය කිරීමට මාධ්‍යවේදීන්ට ද අවස්ථාව දී තිබිණි.

‘වයිරසයෙන් බේරෙන්න මම සති එකහමාරක් තිස්සේ හයිඩ්‍රොක්සික්ලෝරෝක්වීන් පෙත්තක් දිනපතා බොනවා. මම විතරක් නොවෙයි, වයිරසය එක්ක සටන් වදින සෞඛ්‍ය බලධාරීන් වෛද්‍යවරුන් ඇතුළු බොහෝ දෙනකු හයිඩ්‍රොක්සික්ලෝරෝක්වීන් පෙත්තක් දිනපතා බොනවා. ඒ වයිරසය ආසාදනය වීම වළක්වා ගන්න. අතුරු ආබාධ කිසිවක් නැහැ. හයිඩ්‍රොක්සික්ලෝරෝක්වීන් බීවා කියලා හොඳක් මිසක් නරකක් නැහැ. ඒක වසර 40 ක් තිස්සේ මැලේරියාවටත් ලූපස් රෝගයටත් ප්‍රතිකාරයක් ලෙස ලබා දෙන බෙහෙතක් එහි ගුණ ඔබ පුදුම කරවාවි’ යැයි ඇමෙරිකානු ජනාධිපතිවරයා එම අවස්ථාවේදී කීය.

හයිඩ්‍රොක්සික්ලෝරෝක්වීන් නමැති මෙම ඖෂධය අතුරු ආබාධවලින් පිරුණු එකක් බවත් වෛද්‍ය අධීකෂණය යටතේ මෙය භාවිතයට නොගත යුතු බවත් ඇමෙරිකා එක්සත් ජනපද වෛද්‍ය සභාව අවස්ථා කිහිපයකදීම ප්‍රකාශ කළේය. ඇමෙරිකාවේ ආහාර සහ ඖෂධ පාලන අධිකාරිය පවා හයිඩ්‍රොක්සික්ලෝරෝක්වීන් භාවිතයට ගැනීමෙන් වළකින්නැයි ඇමෙරිකානු ජනතාවට උපදෙස් දී ඇත.

‘‘මම ධවල මන්දිරයේ වෛද්‍යවරයාගෙන් මේ ගැන ඇහුවා, ඔබ කැමැති බිව්වාට කමක් නැතැයි’’ ඔහු කීවා යැයි ද ජනාධිපතිවරයා කීවේය. ධවල මන්දිරයේ වෛද්‍යවරයා වන වෛද්‍ය ෂෝන් කොන්ලේ සම්බන්ධ කරගැනීමට ඇමෙරිකා එක්සත් ජනපද පුවත් සේවා උත්සාහ කර තිබිණි. වෛද්‍ය ෂෝන් කොන්ලේ ෆොක්ස් රූපවාහිනි සේවයට සම්මුඛ සාකච්ඡාවක් ලබාදෙමින් ඔහු එම බෙහෙත අනුමත නොකළ බවක් පැවැසුවේ යැයි රොයිටර්ස් පුවත් සේවය වාර්තා කර තිබිණි.

ධවල මන්දිරය මේ අතරවාරයේදී වෛද්‍ය ෂෝන් කොන්ලේගේ උපදෙස් සහිත ලියවිල්ලක් ද ප්‍රසිද්ධියට පත් කර තිබිණි. ඇමෙරිකානු ජනාධිපති ඩොනල්ඩ් ට්‍රම්ප් යහපත් සෞඛ්‍ය තත්ත්වයෙන් පසුවන බවත් ඔහු සෑම දිනකදීම ‘කොවිඩ්-19’ පරීක්ෂණවලට යොමු කරන බවත් පවසා තිබිණි.

‘‘ජනාධිපතිවරයා හොඳ සෞඛ්‍ය තත්ත්වයෙන් පසුවෙනවා. ඔහු සෑම දිනකදීම ‘කොවිඩ්-19’ පරීක්ෂණවලට යොමු කළා. ඔහු වයිරස රෝග ලක්ෂණ පෙන්නුම් කරන්නේ නැහැ. ඔහුට වයිරසය ආසාදනය වී නැති බව පරීක්ෂණවලින් දිගින් දිගටම අනාවරණය වී තිබෙනවා. ජනාධිපතිවරයාත් සමඟ මා මේ සම්බන්ධයෙන් දිගින් දිගටම සාකච්ඡා කළා. ‘හයිඩ්‍රොක්සික්ලෝරෝක්වීන්’ තියෙන අවදානමට වඩා ප්‍රතිඵල වැඩි යි අපි දෙදෙනාම නිගමනයකට ආවා’’ යැයි ධවල මන්දිරය ප්‍රසිද්ධියට පත් කළ ලියවිල්ලේ සඳහන්ව තිබිණි.

‘කොවිඩ්-19’ හෙවත් නව කොරෝනා වයිරසයට තවමත් කිසිදු එන්නතක් හෝ බෙහෙතක් හෝ සොයාගෙන නොමැති බැවින්, මරණාසන්න රෝගීන්ට හයිඩ්‍රොක්සික්ලෝරෝක්වීන් ලබා දීම පළමුවෙන් කළේ ප්‍රංශ වෛද්‍යවරුන්ය.

එය සාර්ථක වූ අතර හයිඩ්‍රොක්සික්ලෝරෝක්වීන් සුදුසු බව මුලින්ම ලොවට නිර්දේශ කළේ ප්‍රංශ වෛද්‍ය සභාවය. ඒ අනුව, ජෝර්දානය පමණක් නොව එක්සත් අරාබි එමිරේට්ස් රාජ්‍යය ද ඉන්දියාවෙන් හයිඩ්‍රොක්සික්ලෝරෝක්වීන් ඖෂධ තොගයක් ඇණවුම් කළේය.

හයිඩ්‍රොක්සික්ලෝරෝක්වීන් ගැන වාර්තා වීමත් සමඟ ජනපති ට්‍රම්ප් පසුගිය කාලයේ දිගින් දිගටම ඒ සම්බන්ධයෙන් මාධ්‍ය හමුවේ පැවැසුවේය. ඇමෙරිකන් වසංගත රෝග විද්‍යායතනයේ ප්‍රධානියා මෙන්ම ජනපති ට්‍රම්ප්ගේ කොරෝනා වයිරස කාර්ය සාධක බලකායේ ප්‍රධානියා ද වන වෛද්‍ය ඇන්තනි ෆවුචි පවා හයිඩ්‍රොක්සික්ලෝරෝක්වීන් ඖෂධය අනුමත කර නොමැත. ඔහු ද නිරන්තරයෙන් පෙන්වා සදී ඇත්තේ එය අතුරු ආබාධ බහුල අනතුරුදායක ඖෂධයක් කියාය.

මේ අතර ප්‍රංශ වෛද්‍ය සභාව දැන් පවසා ඇත්තේ ‘හයිඩ්‍රොක්සික්ලෝරෝක්වීන්’ මැලේරියා නාශක ඔසුව, කොවිඩ්-19 ආසාදිතයන්ට ලබා දීම වහා නැවැත්විය යුතු බවය. ඒ, ‘හයිඩ්‍රොක්සික්ලෝරෝක්වීන්’ භාවිතයට ගත් බොහෝ දෙනකු මේ වනවිට හෘද රෝගීන් බව තහවුරු වී ඇති නිසාය.

තමන් සති එකහමාරක් තිස්සේ හයිඩ්‍රොක්සික්ලෝරෝක්වීන් බෙහෙත් පෙත්තක් දිනපතා බොනවා යැයි ඇමෙරිකානු ජනාධිපතිවරයා කළ ප්‍රකාශය මහත් ආන්දෝලනයක් නිර්මාණය කළේය. ජනාධිපති ඩොනල්ඩ් ට්‍රම්ප් කරන ප්‍රකාශ පිළිනොගන්නා ලෙසත් ‘හයිඩ්‍රොක්සික්ලෝරෝක්වීන්’ ඖෂධයක් ලෙස භාවිත නොකරන ලෙසත් ඇමෙරිකා එක්සත් ජනපද වෛද්‍යවරු ජනාධිපතිවරයාගේ ප්‍රකාශයෙන් පසු එරට ජනතාවගෙන් දිගින් දිගටම ඉල්ලා සිටියහ.

ඇමෙරිකානු ජනාධිපතිවරයාගේ මෙම ප්‍රකාශය වගකීම විරහිත ක්‍රියාවක් බව මේ සම්බන්ධයෙන් සී.එන්.එන්. රූපවාහිනියට අදහස් දක්වමින් ඩිමොක්‍රටික් පක්ෂයේ සහ නියෝජිත මන්ත්‍රී මණ්ඩලයේ කතානායක නැන්සි පෙලොසි කීවාය.

‘‘ඔහු අපේ ජනාධිපති, විද්‍යාඥයන් අනුමත නොකරපු බෙහෙතක් ජනාධිපතිවරයා භාවිතයට ගන්න එක මං පිළිගන්නේ නැහැ. විශේෂයෙන්ම ඔහුගේ වයසේ කෙනෙක්’’ යැයි ඇය තවදුරටත් කීවාය.

ඇමෙරිකානු ජනාධිපතිවරයා ‘කොවිඩ්-19’ වසංගතයේ ව්‍යාප්තිය පාලනය කිරීමට පැළැඳිය යුතු යැයි නිර්දේශ කර තිබෙන මුඛ ආවරණ පැළැඳීම ද ප්‍රතික්ෂේප කරයි.

රොයිටර්ස්

055