තවත් දින පහකින් පැවැත්වෙන ජනාධිපතිවරණය දෙස ඉන්දියාව විමසිල්ලෙන් බලා සිටී. චීනය සමඟ වැඩි හිතවත්කම් පවත්වන ගෝඨාභය රාජපක්ෂ මහතාත් වත්මන් පාලක පක්ෂය වන එක්සත් ජාතික පක්ෂයේ නියෝජ්‍ය නායක අමාත්‍ය සජිත් ප්‍රේමදාස මහතාත් ජනාධිපතිවරණයට ඉදිරිපත්ව සිටින අපේක්ෂකයෝ 35 දෙනකේ අතුරින් ඉදිරියට පැමිණ සිටිති.

කෙසේ නමුත් ලබන සෙනසුරාදා පැවැත්වෙන ජනාධිපතිවරණයේ ප්‍රතිඵලය ඉන්දියානු සාගරයේ දකුණුදිග කලාපයේ ඉන්දියාවේ පැවැත්වීම කෙරෙහි දැඩි බලපෑමක් එල්ල කරනු ඇත.

ශ්‍රී ලංකා ඉතිහාසයේ පළමුවැනි වරට ජනාධිපති ධුරය දරන්නකු, අගමැති ධුරය හොබවන්නකු හෝ විපක්ෂ නායකයකු ජනාධිපතිවරණයට ඉදිරිපත් නොවන ජනාධිපතිවරණය මෙවර ජනාධිපතිවරණයයි.

ජනාධිපතිවරණයට අපේක්ෂකයන් 35 දෙනකු නාම යෝජනා ලබා දුන්න ද ශ්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ මහතා සහ එක්සත් ජාතික පක්ෂය ප්‍රමුඛ නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස අතර ප්‍රධාන තරගය නිර්මාණය වී තිබේ. ගෝඨාභය රාජපක්ෂ මහතා යනු චීනය සමඟ වැඩි හිතවත්කම් පෑ හිටපු ජනාධිපති මහින්ද රාජපක්ෂ මහතාගේ සොහොයුරාය.

ගෝඨාභය රාජපක්ෂ මහතා ජනාධිපතිවරණය ජයගැනීමේ වැඩි සම්භාවිතාවක් තිබෙන අපේක්ෂකයකු වුවත් මැතිවරණය සමබර අතර ප්‍රධාන අපේක්ෂකයන් දෙදෙනා අතර දැඩි තරගයක් පවතී.

ගෝඨාභය රාජපක්ෂ මහතා තරම් ජනප්‍රියත්වයක් නොලද සජිත් ප්‍රේමදාස මහතා කළු අශ්වයකු මෙන් නැගී සිටීමේ වැඩි ඉඩකඩක් පවතී. සජිත් ප්‍රේමදාස මහතා ආමන්ත්‍රණය කරන්නේ ජනගහනයෙන් හතරෙන් එකකට හිමිකම් කියන සුළු ජාතික ප්‍රජාවට සහ ග්‍රාමීය ප්‍රජාවටය.

අමාත්‍ය ධුරය හෙබවූ වසර පහක කාලයේදී තරමක නිහඬ ප්‍රතිපත්තියක් අනුගමනය කළ සජිත් ප්‍රේමදාස මහතා මතභේදවලට පැටළුණේ නැති තරම්ය. ජනාධිපති මෛත්‍රීපාල සිරිසේන මහතා රනිල් වික්‍රමසිංහ මහතා අග්‍රාමාත්‍ය ධුරයෙන් ඉවත් කර මහින්ද රාජපක්ෂ මහතා අග්‍රාමාත්‍ය ධුරයට පත් කිරීමත් සමඟ ඇතිවූ දේශපාලන වියවුලේදීද රනිල් වික්‍රමසිංහ මහතා නැවත වරක් අග්‍රාමාත්‍ය ධුරයට පත් කර තත්ත්වය ස්ථාවර කිරීම දක්වා ක්‍රියාවලියේදී සජිත් ප්‍රේමදාස මහතා ප්‍රධාන කාර්යභාරයක් ඉටු කළේය.

නරේන්ද්‍ර මෝදි මහතා අග්‍රාමාත්‍යවරයා ලෙස පළමු වරට ශ්‍රී ලංකාවේ නිල සංචාරයකට එක්වූ අවස්ථාවේදී, ගුවන් තොටුපොළේදී ඔහු පිළිගැනීමට පැමිණියේද සජිත් ප්‍රේමදාස මහතාය.

1993 දී ඝාතනයට ලක්වූ ශ්‍රී ලංකාවේ තෙවැනි ජනාධිපතිවරයා වන රණසිංහ ප්‍රේමදාස මහතාගේ පුත්‍රයා වන සජිත් ප්‍රේමදාස මහතා කොළඹ ප්‍රභූ පැළැන්තියෙන් තරමක් ඈත්ව සිටින අතර තමන් මහජනතාවගේ මිනිසා යැයි ප්‍රකාශ කරයි.

නිරීක්ෂකයන්ට අනුව කුලය සජිත් ප්‍රේමදාස මහතාට අමතර ඡන්ද කිහිපයක් ගෙනෙනු ඇතැයි පැවසේ.
තමාගේ පාලනයක් යටතේ හිටපු හමුදාපති ෆීල්ඞ් මාර්ෂල් සරත් ෆොන්සේකා ආරක්ෂක අමාත්‍ය ධුරය හොබවන බව ද සජිත් ප්‍රේමදාස මහතා එක් අවස්ථාවකදී පැවැසීය. රාජපක්ෂ පාලන සමයේදී දූෂණ චෝදනා මත සරත් ෆොන්සේකා මහත සිරභාරයට ද පත්විය.

ජනාධිපතිවරණයෙන් ජයග්‍රහණය කළහොත් තිස් වසරක සිවිල් යුද්ධය සමයේදී සිදුවුණා යැයි කියන යුද අපරාධ සම්බන්ධයෙන් එල්ල වන චෝදනා ප්‍රතික්ෂේප කරන බවත් ඒ සම්බන්ධයෙන් විමර්ශනය කිරීම සඳහා වත්මන් ආණ්ඩුව එක්සත් ජාතීන්ගේ ආරක්ෂක කවුන්සිලය සමඟ ඇති කරගත් ගිවිසුම පිළිනොගන්නා බවත් ගෝඨාභය රාජපක්ෂ මහතා ඉකුත් දිනෙක පැවැති මාධ්‍ය හමුවකදී පැවැසීය.

ජනාධිපතිවරණය සඳහා මිලියන 16කට ආසන්න ජනතාවක් සුදුසුකම් ලබා සිටින අතර නොවැම්බර් 16 වැනිදා ප්‍රකාශිත ඡන්ද ප්‍රමාණය සියයට 80 ඉක්මවා යනු ඇතැයි මැතිවරණ කොමිෂන් සභාව අපේක්ෂා කරයි.

වසර 2015 සිට ශ්‍රී ලංකාව තුළ ඉන්දියාව ක්‍රියාත්මක කරන ලද ව්‍යාපෘතිවල වර්ධනයක් දක්නට ලැබිණි. එමෙන්ම ඉන්දියාව සහ ශ්‍රී ලංකාව අතර සබඳතා ද විවිධ අංශවලින් වැඩි විය.

ඉන්දියාව ශ්‍රී ලංකාව තුළ ආයෝජන සහ සංවර්ධන ව්‍යාපෘති රැසක්ම ක්‍රියාත්මක කළ අතර විශේෂයෙන්ම වරාය, ගුවන් සේවා, දුම්රිය යනාදී අංශවලට ඉන්දියාව දුන් දායකත්වය කැපී පෙනුණි. ඒ අතරවාරයේදී සිරිසේන-වික්‍රමසිංහ ආණ්ඩුව ශ්‍රී ලංකාව තුළ චීනයේ පැවැත්ම ද සමබරව පවත්වාගෙන යෑමට දැඩිව උත්සුක විය.   

(ද ඉකොනොමික්ස් ටයිම්ස් ඇසුරිනි)

055

(ඡායාරූප -  ඒ.එෆ්.පී. සහ රොමේෂ් ධනුෂ්ක සිල්වා)