(*** රංජන් කස්තුරි සහ *** මනෝප්‍රිය ගුණසේකර)

ශ්‍රී ලංකාවට නැගෙනහිර මුහුදු සීමාවේදී ගිනි ගැනීමට ලක්වූ එම්.ටී. නිව් ඩයමන්ඩ් නෞකාවේ ගින්න නිවීමට දැරූ වියදම් සඳහා රුපියල් කෝටි 34ක වන්දි මුදලක් ලබාදෙන්නැයි නීතිපතිවරයා එම නෞකාවේ හිමිකරුවන්ට ඊයේ (16) දැනුම් දුන්නේය.

නෞකාවේ ගින්න නිවීමට අදාළ සියලු කටයුතු සඳහා ශ්‍රී ලංකාවට දැරීමට සිදුවූ වියදම හානි පූර්ණය කිරීම සඳහා එම මුදල ඉල්ලන බව නීතිපති දප්පුල ද ලිවේරා මහතා නෞකාවේ හිමිකරුවන්ගේ නීතිඥවරුන්ට දැනුම් දුන් බව නීතිපතිවරයාගේ සම්බන්ධිකරණ නිලධාරිනී නීතිඥ නිශාරා ජයරත්න මෙනවිය පැවැසුවාය.

නාවික හමුදාව, ගුවන් හමුදාව, ශ්‍රී ලංකා වරාය අධිකාරිය, කොළම ඩොක්යාඩ් සමාගම, සමුද්‍රීය පරිසර ආරක්ෂණ අධිකාරිය හෙවත් මීසා ආයතනය සහ වෙරළ සංරක්ෂණ දෙපාර්තමේන්තුව යන සියලු ආයතන ගින්න නිවීම සඳහා කළ වියදම මෙලෙස ගණනය කර ඇති බව ද නිශාරා ජයරත්න මෙනවිය කීවාය.

මෙලෙස ගණනය කර ඇත්තේ පෙරේදා (15) දිනය දක්වා කළ වියදම් පමණක් බව ද නෞකාව ශ්‍රී ලංකා මුහුදු සීමාවෙන් පිටතට රැගෙන ගිය පසුව ශ්‍රී ලංකාවට දැරීමට සිදුවූ මුළු වියදම ගණනය කිරීමට නීතිපතිවරයා අපේක්ෂා කරන බව ද ජයරත්න මෙනවිය සඳහන් කළාය.

තෙල් කාන්දුව නිසා සමුද්‍රීය පරිසරයට සිදුවූ හානිය පිළිබඳව සමුද්‍රීය පරිසර ආරක්ෂණ අධිකාරිය මගින් සොයා බලාගෙන යන අතර එහි වාර්තා ඉදිරි දින කිහිපය තුළ නීතිපතිවරයා වෙත ලැබීමට නියමිත බව ද ඇය පැවැසුවාය.