‍(විනීතා එම්. ගමගේ)

බත්තරමුල්ල සෙත්සිරිපායේ සිව්වන මහලේ පිහිටි සමෘද්ධි සංවර්ධන දෙපාර්තමේන්තුවේ කොවිඞ් ආසාදිත කළමනාකරණ සහකාර නිලධාරිනියගේ සැමියා මාළු වෙළඳපොළෙහි ව්‍යාපාරිකයෙකු බැවින් නිරෝධායනයේ සිටිය යුතු බවත් එසේ තිබිය දී ඇය සේවයට ආවේ කෙසේ දැයි පරීක්ෂණයක් පවත්වන ලෙසත් ඉල්ලමින් සමෘද්ධි සංවර්ධන නිලධාරින්ගේ සංගමය සමෘද්ධි අමාත්‍යංශ ලේකම්වරයා සහ යුදහමුදාපතිවරයා වෙත ලිපියක් යවා ඇත.

කොවිඞ් 19 රෝගය වළක්වා ගැනීමට සමෘද්ධි බලධාරින් වගකීමෙන් කටයුතු කර නැති බව මෙම සිද්ධියෙන් පැහැදිලි යැයි ද එම ලිපියේ සඳහන් වේ.

සමෘද්ධි සංවර්ධන දෙපාර්තමේන්තුව සෙත්සිරිපායේ සිව්වන මහලේ පවතින අතර එම මහලේ සනීපාරක්ෂක පහසුකම් ප්‍රමාණවත් නොවන බැවින්  එහි කාර්ය මණ්ඩල තෙවන මහලේ සනීපාරක්ෂක පහසුකම් භාවිතා කරන බවත් එම සංගමය කියයි. ඊට අමතරව සියලු දෙනාම විදුලි සෝපාන ද භාවිතා කරන බැවින් සමස්ත සෙත්සිරිපාය ගොඩනැගිල්ලම අවදානමක පවතින බවත් එම සංගමය වැඩිදුරටත් පෙන්වා දෙයි.