(මනෝප‍්‍රිය ගුණසේකර)
 
ඉඩම් ආරවුලක් මත අසල්වැසියකුට 13 පළකට පිහියෙන් ඇන මරාදැමීමේ චෝදනාවට වරදකරුවන් වු පුද්ගලයින් දෙදෙනෙකුට කොළඹ මහාධිකරණ විනිසුරු මංජුල තිලකරත්න  මහතා අද (14) මරණ දඬුවම් නියම කළේය.
 
මීට වසර 09 කට පෙර කැලණිය වරාගොඩවත්තේ සිය නිවසේ රාත‍්‍රී ආහාර ගනිමින් සිටි අසල්වාසියාගේ නිවසට ගොස් ඔහුට පහරදී ඔහුගේ නිවස ඉදිරිපිටදීම පිහියෙන් ඇන මරාදැමු බවට විත්තිකරුවන්ට එරෙහි චෝදනාවන්ට ඔවුන් වරදකරුවන් බව විනිසුරුවරයා තීන්දු කර තිබිණි.
 
චෝදනාවන්ට වරදකරුවන් වීම නිසා මෙලෙස දඬුවම් නියම වුයේ කැලණිය වරාගොඩ වරාගොඩවත්තේ පදිංචිකරුවන් වන සුදේශ් රංජිත් ප‍්‍රියදර්ශන (55) සහ ධර්මසිරි විජේරත්න හෙවත් සිරිල් හෙවත්  අප්පච්චි (63) නමැත්තන්ටය.
 
2009 අගොස්තු මස 25 වැනිදා හෝ ඊට ආසන්න දිනයක කැලණිය වරාගොඩදී නීතීවිරෝධී රැස්වීමක සාමාජිකයින් ලෙස කටයුතු කරමින් ඩබ්ලිව්.ජේ. ධර්මසිරි ජයසිංහ නමැත්තා ඝාතනය කරන ලදැයි විත්තිකරුවන්ට එරෙහිව නීතීපතිවරයා චෝදනා නඟා තිබිණි.
 
වසර 9 කට පෙර සිදුවු මෙම සිද්ධිය සම්බන්ධයෙන් ධර්මසිරි විජේරත්න හෙවත් සිරිල් හෙවත්  අප්පච්චි නමැති විත්තිකරුගේ බිරිඳ දරුවන් සහ ඥාතීන් ඇතුළු අටදෙනෙකුට එරෙහිව නීතීපතිවරයා විසින් නඩු පවරා තිබු අතර නඩු විභාගය අවසානයේදී විත්තිකරුවන් හයදෙනෙකුට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර නැතැයි තීරණය කළ විනිසුරුවරයා එම විත්තිකරුවන් හයදෙනා සියළුම චෝදනාවලින් නිදොස් කර නිදහස් කළේය.
 
දීර්ඝ නඩු විභාගයෙන් පසුව මෙම විත්තිකරුවන් දෙදෙනොට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කොට ඇතැයි තීරණය කරමින් එම චෝදනාවන්ට ඔවුන් වරදකරුවන් බව තීරණය කළ විනිසුරුවරයා ඔවුන් දෙදෙනොටම මරණීය දඬුවම් නියම කළේය.
 
පැමිණිල්ල වෙනුවෙන් රජයේ නීතීඥ ඉන්දිකා නෙළුම්මිණි මහත්මිය සහ ඇන්ජලෝ වැන්හොව් මහතා සමඟ ජ්‍යෙෂ්ඨ රජයේ නීතීඥ ශ‍මින්ද වික‍්‍රම මහතා පෙනී සිටියේය.