(ඩයනා උදයංගනී සහ තරිඳු ජයවර්ධන)

රටේ අසමගියක් ඇති නොකරන ලෙස සියලූ ජනතාවගෙන් ඉල්ලා සිටින බව ජනාධිපති ලේකම් ඔස්ටින් ප‍්‍රනාන්දු මහතා අද (7) පැවසීය.

එක් ජාතියකට පමණක් නොව සියලූ ජාතීන්ට ගැටලූ මතුවන අවස්ථා ඇති බව කී ජනාධිපති ලේකම්වරයා රටෙහි සාමයට හානිකර තත්ත්වයක් ඇතිවී තිබෙන මෙම අවස්ථාවේවත් ජාතියක් ලෙස එකමුතු වී එම ගැටලූවලට විසඳුම් සෙවිය යුතු බව සඳහන් කළේය.

ජනාධිපති ලේකම් ඔස්ටින් ප‍්‍රනාන්දු මහතා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (7) පැවති මාධ්‍ය හමුවක් අමතමිනි.

එහිදී වැඩිදුරටත් අදහස් දැක්වූ ජනාධිපති ලේකම්වරයා මෙසේ ද කියා සිටියේය.

‘‘ අද ඇති වී තිබෙන තත්ත්වය සැලකුවහොත් මේ හැම දෙයින්ම ජනතාවට යම් අපහසුතාවක් වෙන්න පුළුවන්. රටේ සාමය නැතිකර අසමගිය ඇති නොකරන ලෙස ජනතාවගෙන් ඉල්ලා සිටිනවා. සමාජ මාධ්‍ය ජාල සීමා කිරීම තුළ සමහරුන්ට ගැටළු ඇතිවෙන බව පිළිගන්නවා. නමුත් එම මාධ්‍ය තුළින් ඉතා පිළිකුල් සහගත ලෙස ආගම්වාදී, ජාතිවාදී, වර්ගවාදී දේ ප‍්‍රචාරයවීම හා පුද්ගල චරිත ඝාතන සිදුවෙනවා. 

අද ලංකාවේ තත්ත්වය අනුව සාධාරණව සිතන අය මේ තිබෙන සමහර දේ හොඳයි කියා කියන්නේ නැහැ. මේවාට කැමති ජාතිවාදී, වර්ගවාදී ලෙස සිතන රට තුළ අසමගියක් ඇතිවීම බලාපොරොත්තු වන අයට පමණයි. හැම ජනකොටසකටම විරුද්ධව මෙවැනි දේ සිදුවෙනවා. මේවා නවත්වන්න ගියත් අසහනයක් මතුවෙන්න පුළුවන්.  

මේ ගිනිගන්න අවස්ථාවේවත් අපිට ඇයි රටේ සමගිය, ජාතියක් ලෙස ඇතිවන කරදර ගැන හිතන්න බැරි. මමත් සමාජ මාධ්‍ය භාවිතා කරනවා. ඒත් මේ විනාශය වළක්වන්න අවශ්‍ය නිසා මම මෙවැනි තීන්දුවක් ගැනීම ගැන සතුටු වෙනවා. 

වෛරී ප‍්‍රකාශ පතුරුවන අය සම්බන්ධවත් ක‍්‍රියාමාර්ග ගත යුතුයි. දරුවන්ගේ අනාගතය නැති කරන්න දෙන්න එපා. රටේ උන්නතිය වෙනුවෙන් ජාතික සම`ගිය අවශ්‍යයි. මාධ්‍යවල ආචාර ධර්ම තිබෙනවා. නමුත් ඇතැම් තැන්වල ඒවා නොතකා මියගිය අයගේ සිරුරු පවා පළ කරනවා.’’ යැයි ද ජනාධිපති ලේකම්වරයා ස`දහන් කළේය. 

සමාජ ජාල අවහිර කළේ තාවකාලිකවයි - ආරක්‍ෂක ලේකම්

ෆේස් බුක්, වට්ස් ඇප් සහ වයිබර් වැනි සමාජ ජාල සේවා අකි‍්‍රය කර ඇත්තේ තාවකාලිකව බව ආරක්‍ෂක ලේකම් ජනාධිපති නීතීඥ කපිල වෛද්‍යරත්න මහතා කියයි. 

‘‘සමාජ මාධ්‍ය ජාල සීමා කිරීමේ තීරණයක් ගැනීමට අපට සිදුවුණේ අසත්‍ය ප‍්‍රචාර පැතිරවීම, ප‍්‍රචණ්ඩත්වය ඇති කළ හැකි දේ පැතිරවීම වැළැක්වීම වෙනුවෙනුයි. එම සමාජ මාධ්‍ය අවහිර කර ඇත්තේ තාවකාලිකවයි. මෙය කලහකාරී දෙයක් ඇතිවන ආකාරයේ කටයුතු වැළැක්වීම සඳහා ජාතික ආරක්‍ෂාව ගැන සිතා ගත් තීරණයක්. මෙය කළේ මහ ජනතාවගේ ආරක්‍ෂාව සඳහායි. මේ අවස්ථාවේ ජනතාව බිය වැද්දීම නොකළ යුතුයි.’’ යයි කපිල වෙද්‍යරත්න මහතා අද සවස පැවැති පුවත් පත් සාකච්ඡාවේදී පැවසීය. 

සාමය කඩකරන අයට නීතිය තදින්  - ආරක්‍ෂක මාණ්ඩලික ප‍්‍රධානී

මහජන සාමය කඩවන ආකාරයේ කටයුතු කරන අයට එරෙහිව තදින් නීතිය ක‍්‍රියාත්මක කරන බව ආරක්‍ෂක මාණ්ඩලික ප‍්‍රධානී අද්මිරාල් රවීන්ද්‍ර විජේගුණරත්න මහතා පවසයි. රජයේ ප‍්‍රවෘත්ති දෙපාර්තමේන්තුවේදී අද (7) පැවති මාධ්‍ය හමුවක් අමතමින් අද්මිරාල් රවීන්ද්‍ර විජේගුණරත්න මහතා එසේ පැවසීය. 

‘‘ඉදිරියේදී මහජන සාමය කඩවන ආකාරයේ කටයුතු කරන අයට එරෙහිව තදින් නීතිය ක‍්‍රියාත්මක කරනවා. ඇඳිරිනීතිය කඩකරන අයට එරෙහිව කටයුතු කිරීමට අවශ්‍ය නීතිමය ප‍්‍රතිපාදන හමුදාවට ලැබී තිබෙනවා. අපට අවශ්‍ය මෙය හැකි ඉක්මනින් අවසන් කර ජනතාව අතර භේදය නැති කර හැකි ඉක්මනින් රටට සාමය ගෙනඒමටයි.  දැනට මේ දී ඇති නියෝගවලින් අපට වගකිවයුත්තන් අත්අඩංගුවට ගෙන පොලීසියට භාර දී කටයුතු කළ හැකියි. 

අපි අදාළ ප‍්‍රදේශවලට අවශ්‍ය තරම් ආරක්‍ෂාව යොදවා තිබෙනවා. අවශ්‍ය වුවහොත් තව දුරටත් ආරක්‍ෂාව තර කරන්න කටයුතු කරනවා.’’ 

අතිරේක සොලිසිටර් ජනරාල්, ජනාධිපති නීතීඥ යසන්ත කෝදාගොඩ මහතා මෙහිදී මෙසේ සඳහන් කළේය.

‘‘රටේ ඇතිවූ තත්ත්වය සළකා හදිසි නීතිය ප‍්‍රකාශයට පත්කර තිබෙනවා. ඒ අනුව ඊයේ රාත‍්‍රියේ හදිසි නීති රෙගුලාසි ප‍්‍රකාශයට පත්කර තිබෙනවා. ඒ අනුව විශේෂ වරදවල් හඳුන්වා දී තිබෙනවා. ජීවිත හානිකිරීම, තුවාල කිරීම, බියගැන්වීම, තර්ජන කිරීම, ලිංගික හිංසන, රාජ්‍ය හා පෞද්ගලික දේපල හානි කිරීම වැනි තත්ත්වයන්හිදී මෙන්ම අසමගිය ඇතිවන කටයුතු කිරීමේදී සාමාන්‍ය නීතියට වැඩි දඬුවම් පනවා තිබෙනවා. අත්අඩංගුවට ගැනීමේ බලය ත‍්‍රිවිධ හමුදාවන්ටත් ලබාදී ඇති නමුත් ඔවුන්ට කිසිවෙකු රඳවා තබාගත නොහැකියි. අත්අඩංගුවට ගැනීමකින් පසු පොලීසියට භාර දිය යුතු වෙනවා.’’ 

නාවික හමුදාපති වයිස් අද්මිරාල් සිරිමෙවන් රණසිංහ, යුද හමුදා මාධ්‍ය ප‍්‍රකාශක බි‍්‍රගේඩියර් සුමිත් අතපත්තු, ගුවන් හමුදා මාධ්‍ය ප‍්‍රකාශක ගෲප් කපිතාන් ගිහාන් සෙනෙවිරත්න, ඇතුළු ආරක්‍ෂක අංශ නිලධාරීන් පිරිසක් ද මෙම මාධ්‍ය හමුවට සහභාගී වූහ.

ජනාධිපති ලේකම් ඔස්ටින් ප‍්‍රනාන්දු මහතා මාධ්‍ය හමුව ඇමතූ අයුරු. අතිරේක සොලිසිටර් ජනරාල්, ජනාධිපති නීතීඥ යසන්ත කෝදාගොඩ, ආරක්‍ෂක ලේකම් ජනාධිපති නීතීඥ කපිල වෛද්‍යරත්න, ආරක්‍ෂක මාණ්ඩලික ප‍්‍රධානී අද්මිරාල් රවීන්ද්‍ර විජේගුණරත්න යන මහත්වරුන් සහ ත‍්‍රිවිධ හමුදා මාධ්‍ය ප‍්‍රකාශකවරුන් ද මෙහි වෙති.

ඡායාරූපය -  ජයමාල් චන්ද්‍රසිරි