(කාංචන කුමාර ආරියදාස)

 

දාහත් හැවිරිදි නංගිට බියේ විසිනව හැවිරිදි අයියා කුකුළු කූඩුවක දිවිගෙවන සංවේදී පුවතක් ගලේවෙල ප්‍රාදේශීය ලේකම් කොට්ඨාසයට අයත් ඉබ්බන්කටුව ප්‍රදේශයෙන් වාර්තා වෙයි.

මෙම සොහොයුරියත් සොහොයුරාත් යම්කිසි ආබාධිත තත්ත්වයකින් පසුවෙති. මොවුන් දෙදෙනා කුඩා කල පටන් එකිනෙකාට විරුද්ධව කටයුතු කිරීම සහ එකිනෙකා අසළ සිටීමට පවා නොහැකිවීම නිසා ඔවුන්ගේ මව්පිය දෙපළ දැඩි අර්බුදයකට මුහුණ පා සිටිති.

කුලී වැඩ කිරීමෙන් දවස සරි කරගන්නා මොවුන්ගේ දෙමව්පියෝ වසර ගණනාවක පටන් දුක් විඳිති. ඔවුන්ගේ වැඩිමල් පුතුට වයස අවුරුදු 29 කි. උපතේ සිටම ආබාධිත තත්ත්වයේ පසුවන ඔහු රෝගාබාධ කීපයකින් පෙළෙයි. දෙවැනි දරුවා වශයෙන් උපත ලබා ඇති දියණිය දැනට දාහත් වැනි වියේ පසුවන්නීය. ඇයද කිසියම් රෝගී තත්ත්වයකින් පෙළෙයි. කුඩා කල පටන් මොවුන් දෙදෙනා අතර දැඩි වෙනස්කම් දක්නට ලැබීමත් සමඟ ඔවුන්ගේ දෙමව්පියන්ට දුෂ්කරතා රැසකට මුහුණ දීමට සිදු වී ඇත.

ඔවුන්ගේ මව  වූ එච්. එම්. ධර්මා චිත්‍රානි  (48) මහත්මිය කියා සිටියේ දරුවන් දෙදෙනාව කුඩා කාලයේ තම සැමියා ළඟ තබා තමා විදේශගතව වසර දෙකකට වැඩි කාලයක් එහි සිට ඉපැයූ මුදලින් නිවස තනා ගත් බවය. සැමියාත් තමාත් මාරුවෙන් මාරුවට කුලී වැඩට යන බවද, තම දරුවන් ජීවත් කරවීම සඳහා සමෘද්ධි සහනාධාරය ඉල්ලා සිටිමුත් එය ද නොලැබුණුබව ඇය පැවසුවාය. මෙවර නව සමෘද්ධි සහනාධාර ලාභීන් තෝරද්දී තම පවුලට සුදුසුකම් නොමැති බව ගලේවෙල ප්‍රාදේශීය ලේකම් කාර්යාලයෙන් පැවසූ බවත් ඒවා දේශපාලන තෝරාගැනීම් නිසා තමන්ට සුදුසුකම් නොලැබීම කණගාටුවට කරුණක් බවත් ඇය අප සමඟ කීවාය.

මෙම දරුවන්ගේ පියා වූ  ඒ. එම්. ජයසිංහ බණ්ඩාර(55) මහතා කියා සිටියේ තම දරුවන් දෙදෙනාට මව සහ පියා ළඟම සිටිය යුතු බව යි. දෙදෙනා එකම ස්ථානයක තැබීමට නොහැකි බවත්, ඇතැම් අවස්ථාවලදී ඔවුන් අතර ඇතිවන ගැටුම් වළක්වාලීමට තමන්ට සහ බිරිඳටත් නොහැකි වන බව පැවසීය. දියණිය නිතරම සිය සොහොයුරා සමඟ ගැටුම් ඇතිකරගන්නා බවත්, ඇයට ක්ෂණිකව කෝපය ඇති වන බවත් ඔහු පැවසීය. මේ හේතුව නිසා නැගණියට බයේ  අයියා ගෙය පිටුපස ඇති කුකුළු කූඩුවට යන බවත් එයින් පිටතට ගැනීම සඳහා දැඩි උත්සාහයක් දැරුවද ඔහු නිවසට නොඑන බවත් පියා සඳහන් කළේය. අප එහි ගිය අවස්ථාවේ ඔවුන් දෙදෙනා අපහසුවෙන් පුතුව කූඩුවෙන් පිටතට ගත් අවස්ථාවේ ඇති වූ උණුසුම් තත්ත්වය අපට දැකගත හැකිවිය.

තමන් පදිංචිව සිටින දඹුල්ල  කුරුණෑගල ප්‍රධාන මාර්ගයට මුහුණලා අවම වශයෙන් කුඩා වෙළඳසැලක් පවත්වා ගෙන ගොස් නිවසේ සිට මෙම දරුවන් රැකබලා ගැනීමට අවස්ථාවක් සලසා දෙන්නැයි ඔවුහු ඉල්ලා සිටිති. කුලී වැඩටයෑම හේතුවෙන් දරු දෙදෙනාගේ ජීවිත අනතුරුදායක තත්ත්වයක පවතින බවත් තම වැඩිමහල් පුතාට අසීමිත ලෙස ආහාර අවශ්‍යතාවයක් පැවතීම හේතුවෙන් එයද ඉටු කර ගත නොහැකිබව සිටින බවත් ඇය පැවයසුවාය.

ඔවුන්ගේ ලිපිනය වන්නේ එච්. එම්. ජයසිංහ බණ්ඩා,  454, ඉබ්බන්කටුව, දඹුල්ල යි. 071 7762341 දුරකථන අංකය මගින් මොවුන් හා සම්බන්ධ විය හැක. ලංකා බැංකුවේ ගලේවෙල ශාඛාවේ එච්. එම්. ධර්මා චිත්‍රානි ගිණුම් අංක 7149755 ට මූල්‍යමය දායකත්වයන් දැක්විය හැකිය.