(ගයාන් සූරියආරච්චි)

උණබටවලින් තැනූ ප‍්‍රථම දුරකතන කුලුන බංග්ලාදේශයේ ඩකා නුවර උත්තර ප‍්‍රදේශයේ ගොඩනැගිල්ලක් මත පසුගියදා ස්ථාපිත කෙරිණි.

මෙම උණබට කුලුන බංග්ලාදේශ ඉංජිනේරු විශ්ව විද්‍යාලයේ මහාචාර්ය සයිඞ් ඉෂ්ටියාක් අහමඞ් මහතා ප‍්‍රමුඛ කණ්ඩායම විසින් නිර්මාණය කරනු ලැබ ඇත.

මෙම කුලුන 'එඩොට්කෝ‘ නම් බංග්ලාදේශ සමාගම විසින් ප්‍රචලිත කෙරිණි.මෙය පුනර්ජනනීය සම්පත් භාවිතයේ නව මානයක් ඔස්සේ තිරසාර හා හරිත ඉංජිනේරුකරණය සම්බන්ධව එම සමාගම තැබූ සාර්ථක පියවරක් වන අතරම උණබට භාවිතයෙන් තැනූ දුරකතන කුලුනක් සවිකළ ප‍්‍රථම සමගම බවට පත්වනුයේ  ද එම සමාගමය.

මේ ගැන මහාචාර්ය සයිඞ් ඉෂ්ටියාක් මහතා පැවැසූවේ මෙවන් අදහසකි.

“උණබට වැනි පුනර්ජනනීය සම්පත් බහුල රටක් ලෙස බංග්ලාදේශය හඳුන්වන්න පුළුවන්. රටේ තාක්‍ෂණික දියුණුවට ස්වභාවික සම්පත් ඵලදායී ලෙස භාවිත කළ හැකි ක‍්‍රම සොයාගැනීම ඉතා වැදගත් කොට සලකනවා. උණබටවල ඇති ආවේණික ගුණාංග නිසා දුරකතන කුලූනු ලෙස පහසුවෙන් භාවිත කිරීමේ හැකියාව තිබෙන බව ශක්‍යතා අධ්‍යයනවලින් හඳුනාගැනීමට හැකිවුණා. මෙම උත්සාහය වනුයේ රටේ සංවර්ධනයට මෙන්ම පරිසරය සුරැකීමටත් දායකවීමයි.

උණබටවලට විශාල බරක් දරාගැනීමේ හැකියාව තිබෙන බව පර්යේෂණවලින් සනාථ වුණා. එය දුරකතන කුලූනු සඳහා යෝග්‍ය බවද ඔප්පු වුණා. සුළඟ වේගය පැයට කිලෝමීටර 210 ක් වුවද දරා ගැනීමේ හැකියාව තිබෙනවා. නිසි ලෙස නඩත්තු කළහොත් මෙම උණබට අවුරුදු 10 ක පමණ කාලයක් වුවද ආරක්‍ෂාකරගත හැකිවෙනවා. දින 12 කින් පමණ උණබට කුලූනක් තැනිය හැකියි.ඒ සඳහා වැය වන්නේ වානේ කුලූනු තැනීමට වැයවන බලශක්තියට වඩා අඩු බලශක්තියක්.

ඇන්ටනා 8 ක් දක්වා එකවර සවිකළ හැකිවීම විශේෂත්වයක් ලෙස සැලකිය හැකිය. උණබට වඩා සැහැල්ලූවීම නිසා සවිකරන ගොඩනැගිලිවලට පමණට වඩා වැඩි බර පැටවීමක්  සිදුවන්නේ නෑ. දේශගුණික සහ කෘමි උවදුරුවලින් ආරක්‍ෂාකර ගැනීම සඳහා උණබටවල රසායනික ආලේපනය කිරීමේ ක‍්‍රියාවලිකයට යොමුකරනවා. එම ක‍්‍රියාවලිය ඉතා සාර්ථක ලෙස අප අත්හදා බලා තියෙනවා.“