(තිහගොඩ - උපසේන ලියනගම)
දකුණු පළාතේ උප නගරයක කඩ කාමරයක් වසරකට බදු ගත් විවාහක යුවළක් එහි සපත්තු අලෙවි කිරීමේ ව්‍යාපාරයක් ආරම්භ කළත්, එය සාර්ථක වූයේ නැත. මේ නිසා කොළඹ පදිංචිව සිටි කඩ කාමර හිමියාට මේ බව දන්වා ව්‍යාපාරය වසා දැමීමට ඔවුහු තීරණය කළහ.


ඔහු පැමිණි පසු වසරක් සඳහා බදු ගත්ත ද, දැනට මාස හයක් පමණක් ගතව ඇති බව කියා බදු මුදලින් කොටසක් ආපසු ඉල්ලුව ද ඊට කඩ හිමියා එකඟ නොවූයෙන් මතභේද ඇති වී පසුව ගැටුමක් දක්වා දුරදිග ගියේය.
එන හැඩ හොඳ නැති බව පෙනුන නිසා බදුකරුවන් කඩ කාමරයෙන් ඉවත්වීමට මසක් කල් ඉල්ලූහ. ඊට එකඟ වූ කඩ හිමියා කොළඹ ගියේ මසකින් ආපසු ඒමට සිතාගෙනය.


මාසය ගතවීමටත් පෙර කඩ හිමියා බදු දුන් කඩයට ආපසු පැමිණි විට දුටු දෙයින් ඔහුට තරු පෙනිණ. ඒ වන විට කඩයේ තිබූ සියලු බඩු බාහිරාදිය පමණක් නොව, එහි දොර ජනෙල් පවා ගලවාගෙන ගොස් තිබිණ. වට පිටාවේ සිටියවුන්ගෙන් තොරතුරු ලබා ගනිමින් ඔහු දැන් බදුකරුවන් ගිය තැන් හොයනවාලු.