රාත්‍රී කාලයේදී කාටත් හොරෙන් තම හිතවතියක සමග රැය පහන් කිරීමට යාබද ගම්මානයකට ඇතුළු වූ පුද්ගලයකු ගම්මානයේ පිරිසගේ සැකයට භාජනය වීම නිසා පොලිස් කූඩූවේ ලගින්නට සිදුවූ පුවතක් එළවළු වගාවට නම ගිය උඩරට ප්‍රදේශයේ ගොවි ගම්මානයකින් වාර්තා වේ. 


සිද්ධිය සැකෙවින් මෙසේය.


තමා පදිංචි ගම්මානයට ආසන්නයේ පිහිටි ගම්මානයක හිතවතියක සමග දීර්ඝ කාලයක සිට නිහඬ සබඳතාවක් පැවැත්වූ මැදි වයසේ පසුවූ මෙම පුද්ගලයා අවස්ථාවක් ලද විට ඇය සමග රැය පහන් කිරීමට හුරු වී සිටියේය.


මීට පෙර අවස්ථා ගණනාවකදීම රාත්‍රී කාලයේදී ඇයගේ නිවෙසට ආව ගිය ද රටේ පැවැති සාමකාමී වාතාවරණය නිසා ඔහුගේ ගමන බිමන පිළිබඳව කිසිවකුට ඉව වැටී නොතිබිණි. පසුගිය දිනෙක එලෙසම රාත්‍රී කාලයේදී සිය පෙම්වතිය සමග රැය පහන් කිරීමේ අදිටනින් ඇයගේ නිවෙස පිහිටි ගම්මානයට ඇතුළු වූයේ මල් පැන් වඩියක රස බැලීමෙන් පසුවය. සිය පෙම්වතිය හමුවීමට හිස් අතින් යා නොහැකි නිසා ගම්මානයේ පිහිටි වෙළෙඳසලකට ගොඩවූයේ ඇයට ඉස්තරම් වර්ගයේ චොකලට් එකක් මිලදී ගැනීමත් දුම්වැටියක් දල්වා ගැනීමත් අරමුණු කරගෙනය.


එහෙත් වෙළෙඳසලට ගොඩවූ පුද්ගලයාගේ පැටලිලි සහගත කතා විලාශය හා ඔහු ගම්මානයට ආගන්තුකයකු වීම නිසා ඔහු පිළිබඳව සැක සහිත පුවත ගම්මානය පුරා ලැව්ගින්නක් සේ පැතිර යාම නිසා බියට පත් ගම්වාසීන් ගම්මානය පුරා සැරිසරමින් ආගන්තුකයා සෙවීමට වෙහෙස වූහ.


පොලු_ මුගුරු අතැතිව ගම්වාසීන් තමා පසුපසින් පන්නා එනු දුටු මෙම පුද්ගලයා බියට පත්ව නිවෙසක් තුළ සැඟවී ඇතත් ඔහුගේ එම උත්සාහය නිශ්ඵල වී ඇත්තේ ගම්වාසීන් ප්‍රදේශයේ පොලිස් ස්ථානයට මේ පිළිබඳව දන්වා නිලධාරීන්ගේ සහාය ලබා ගැනීම නිසාය. 


පසුව පොලිස් නිලධාරීන් බීමත්ව සිටි මෙම පුද්ගලයා අත්අංඩංගුවට ගෙන ප්‍රශ්න කිරීමේදී සියල්ල හෙළිදරව් කොට ඇත.   
 (හේවාහැට - එම්. දසනායක)