(තිහගොඩ උපසේන ලියනගම)
බස්නාහිර පළාතේ ප්‍රභූ පවුලකි. පවුලේ සහෝදර සහෝදරියන් විවාහ වී අවට ප්‍රදේශවල පදිංචි වී සිටියද සෑම වසරකම අවසන් මාසයේ මහ ගෙදරට එන්නේ ඥාති සුහදතාව තහවුරු කර ගැනීමේ සාදයකට එක්වීමටය.


පසුගියදා එසේ හමුවූ අවස්ථාවේ රටේ සිදුවන රිය අනතුරු ගැන  කතා කරමින් සිටි විටෙක දැඩි සත්ව අවිහිංසාවාදියකු වූ අයියා කීවේ පසුගිය පෝය දිනයක ප්‍රධාන මාර්ගයේ කිසියම් රියැදුරකු පාරේ සිටි ගවයකු සිය මෝටර් රථයෙහි හප්පා පළා ගොස් ඇති බවය. එම ගවයා පාර මැද පණ අදිමින් සිට මියගිය බව පැවසූ ඔහු “මේක මහා අපරාධයක්” බව පවසමින් එතැන වැටී සිටි මියගිය හරකාට වැඩියෙන් ඒ රිය ගැටුම කළ මිනිහා හරකෙක් බව කීවේ කෝපයෙනි.


මහාමාර්ග දෙපාර්තමේන්තුවේ ඉංජිනේරුවකු වූ බාල සහෝදරයා “අයියා කියන ඔය හරකා මම” කීවේ වට පිටාවේ වූවන් අන්ද මන්ද කරමිනි.


“ඔය හරකා මහ පාර හරහා දුවගෙන ආවේ කුලප්පු වෙලා වගේ. මම වාහනේ පාලනය කර ගත්තේ හරි අමාරුවෙන්. ඒත් ඌ ආපු වේගෙට වාහනේ වැදිල වැටුණා. මම විස්තරේ පොලිසියට කියලා ආවේ මල්ලී කීමෙන් අයියාට කටඋත්තරයක් නැති වුණාලු.