(වියලුව වාර්තාකරු)
විශ්‍රාම ශාලාවක නතර වී තම රාත්‍රී ආහාරය පිළියෙල කරමින් සිටි වන්දනා නඩයක් සතුව තිබූ ගෑස් සිලින්ඩරයක් සොරාගෙන යෑමෙන් පසුව එම සිලින්ඩරය සොයා දීමට නම් එය රැගෙන ගිය පුද්ගලයා සොයා දෙන්නැයි විශ්‍රාම ශාලාවේ බාරකරුවන් විසින් වන්දනාකරුවන්ට පැවසූ බව කියැවෙන පුවතක් ලංකාදීපයට වාර්තා වේ.


වන්දනා නඩය ගමන්ගත් බස් රථයේ රියැදුරා පැවසූ අන්දමට සිද්ධිය මෙසේය.


ගොවිතැනින් ජීවත් වන ගම්බද පිරිසකි. ගොවිතැන් කටයුතු හමාර කළ ඔවුහු ලද අස්වැන්නෙන් කොටසක් විකුණා වන්දනා චාරිකාවක් සංවිධානය කළේ සිය දූ දරුවන් ද ඊට එක්කර ගනිමිනි.


පළමු දිනයේ චාරිකාව හමාර කළ ඔවුහු අගනුවර ප්‍රදේශයේ ප්‍රසිද්ධ ආගමික ස්ථානයක විශ්‍රාම ශාලාවක නතර වූයේ සැපපහසු ස්ථානවල නතර වන්නට තරම් වත්කමක් ඔවුන්ට නොතිබූ නිසාය. විශ්‍රාම ශාලා බාරකරුවන් විසින් ඉල්ලුම් කරන ලද නවාතැන්පොළ ගාස්තුව ගෙවා දැමූ පිරිස තමුන්ට වෙන්කර දුන් කොටස අතුපතුගා පිරිසුදු කොට ඔවුන් රැගෙන ගිය ගෑස් සිලින්ඩරය සහ ඊට සම්බන්ධ ළිප සවි කරනු ලැබුවේ විඩා නිවාගෙන රාත්‍රී ආහාරය පිළියෙල කිරීමේ බලාපොරොත්තුවෙනි.


ගෑස් සිලින්ඩරය සහ ළිප සවි කළ පිරිස් මුලින්ම තේ ටිකක් පානය කිරීම හොඳ යැයි සිතා වතුර මුට්ටියක් ද ළිප තබා එය රත්වන තුරු ඒ අසල වූ ජල කරාමය වෙත ගොස් ඇත්තේ ඇඟපත සෝදා ගැනීමේ බලාපොරොත්තුවෙනි. එහෙත් ඇඟ සෝදාගෙන පැමිණි පිරිසට දැකගන්නට ලැබුණේ තමුන් රැගෙන ආ ගෑස් සිලින්ඩරය අතුරුදන් වී ඇති බවකි. ඉන් කලබලයට පත් පිරිස විශ්‍රාම ශාලාවේ බාරකරු හමුවී තම ගෑස් සිලින්ඩරය අතුරුදන්ව ඇතැයි පවසද්දී ඇඟට පතට නොගත් බාරකරු පවසා ඇත්තේ “ඔයගොල්ලො හොරා අල්ලලා දුන්නොත් මම ගෑස් සිලින්ඩරය හොයලා දෙන්නම්” යනුවෙනි.


විශ්‍රාම ශාලා බාරකරුගේ පිළිතුරෙන් පිරිස අන්දමන්ද වූවත් සිය ස්ථාවරය වෙනස් නොකළ ඔහු දිගින් දිගටම වන්දනා නඩයට පවසා ඇත්තේ තමුන්ට හොරා පෙන්වුවහොත් ගෑස් සිලින්ඩරය යළිත් ලබා දීමට හැකි බවකි. ඔහු සමග කොතෙක් තර්ක කළත් “යකෝ හොරා හොයා ගත්ත නම් වෙන කෙනෙකුට පෙන්නන්න ඕනි නැහැ කරන දේ අපි දන්නවා යැයි පැවැසූ නඩයේ සිටි තරුණ පිරිස ඒ අසල වූ වන රොදට රිංගා ඇත්තේ “දැන් ඉතින් දර ටිකක්වත් හොයාගෙන ඇවිත් උයමු.” යැයි එකිනෙකාට කියා ගනිමිනි.