(තිහගොඩ උපසේන ලියනගම)
වැඩිහිටි නේවාසිකාගාරයක සිටි වියපත් කාන්තාවක් එම නිවාසයේම සිටි මැදිවියේ පිරිමියකු සමග මිතුරුවී අලුත් ජීවිතයක් ගත කිරීමට මහ රෑ පැන යාමේ පුවතක් පසුගියදා අසන්නට ලැබුණේ හිරු බැසයන පළාතේ උපනගරයක වූ වැඩිහිටි නිවාසයකිනි.


කලින් සෞඛ්‍ය දෙපාර්තමේන්තුවට සම්බන්ධ ආයතනයක සේවය කළ ඇය විවාහ වී සිටියේ හමුදා නිලධාරියකු සමගය. ඔහු යුද බිමේදී අතුරුදන් වීමෙන් පසු ඔහුට අයත්ව තිබූ සියලු දේපළ පවුලේ අය අත්පත් කර ගැනීම නිසා අසරණ වූ ඇය මෙම නේවාසිකාගාරයේ පිහිට පතා පැමිණ තිබිණි.


පසුකලෙක එම නිවාසයට ආවේ බිරිඳ විදේශගතවී ආපසු නොපැමිණීම හා එකම පුතු සමග ගැටුම් ඇති කර ගෙන අසරණ වූ මැදිවියේ අයෙකි.


මද කලකින්ම මේ දෙදෙනා අතර සබඳතාවක් ඇතිවිය. නේවාසිකාගාරයේ වුවත් මේ ගැන විවිධ තොරතුරු කීවත් පාලක නිලධාරියා ඒවා විශ්වාස කළේ නැත. එහෙත් පසුගියදා මේ දෙදෙනා වැඩිහිටි නිවාස කාර්යාලයට පැමිණ ඉල්ලා සිටියේ දෙදෙනාට එකම කාමරයක ජීවත්වීමට ඉඩසලසා දෙන ලෙසටය.


මේ ඉල්ලීමෙන් මහත් කෝපයට පත් පාලක නිලධාරී පාලක නිවාස අධ්‍යක්ෂ මණ්ඩලයට දැන්වූයේ මේ අසංවර ජෝඩුව වහාම ඉවත් කරන ලෙසය. එදින රාත්‍රියේ මේ දෙදෙනා නේවාසිකාගාරයෙන් පැනගොස් තිබුණේ තම තමන් සතු සියලුම ඇඳුම් හා බඩු භාණ්ඩ ද පොදි ගසා ගෙනලු.