(ගලිගමුව විශේෂ රොහාන් කුමාර  දිසානායක )

 

වාහන අලෙවිකරණ ස්ථානයෙන් මසකට ලැබෙන ලක්ෂ පහ මදිවී වැඩියෙන් හම්බ කිරීමට ගොස් අවසානයේ කිසිවක් නැතිව සිරගතවීමට සිදුවූ පුවතක් ගලිගමුව පිංදෙණිය පොලිසියෙන් වාර්තා විය.

ඔහු මවුපියන්ගෙන් ලැබුණු වාහන අලෙවිකරණ ස්ථානයක් අගනුවරට ආසන්න ප්‍රදේශයක පවත්වාගෙන ගිය අතර ආයතනයේ වැඩකටයුතු කිරීමට සේවකයෝ කීපදෙනෙක් සිටියහ. මේ ලෙස වාහන අලෙවි කරමින් සේවක පඩි ගෙවා මසකට ලක්ෂ පහක ආදායමක් ඉපයීමට ඔහුට හැකිවිය. මේ ලෙස සිටියදී හිතවතකු ගේ කීමට “කැසිනෝ”_ සූදුව කරන ස්ථානයකට ගොස් ලක්ෂ විස්සක් දිනා ඇති අතර ඔහුට තම වාහන සේල් එකෙන් මසකට ලැබෙන මුදලට වඩා මෙයින් වැඩිපුර මුදලක් උපයාගත හැකි බැවින් තම ආයතනය පසෙක තබා සූදුවෙන් වැඩිපුර හම්බකිරීමට යොමුවිය.

දිනපතා කැසිනෝ සුදුවට යන්නට පටන්ගත් ඔහු මුදල් පරාදවුවත් දේපළද උකසට තැබුවත් කිසිදු ලාබයක් නොවීය. විවාහකයකු වූ මොහු යහමගට ගැනීමට ඥාතීන් සමග බිරිඳ උත්සාහ ගත්තද ඉන් පළක් නොවීම නිසා ඔහුගේ බිරිඳ දරුවා සමග ඇයගේ මව්පියන්ගේ නිවසට ගොස් ඇත. තමා සන්තක සියල්ල නැති වූ පසුව තමන් භාවිතා කළ මෝටර් රථය ද උකස් කර එම මුදල් ද පරාදවූ පසු උකස් කිරීමට දෙයක් නොවීය. වැඩි තණ්හාවට ගිය ඔහුට තිබුණු දේත් ඉපයූ දේත් තම පවුලත් නැති විය.