(පස්ගොඩ - තිලක් එච්. ගමගේ)
ප්‍රදේශය පුරා හමාගිය දැඩි සුළඟින් ගස් කොළං ඇද වැටී නිවෙස්වල වහල පවා සුළඟේ ගසාගෙන ගොස් තිබුණි. විදුලි බලය ද ඇනහිට ජනජීවිතය අඩාලව නොසිතූ විරූ අවස්ථාවන්ට ද මුහුණ පෑමටද සිදුවිය.


ඌරුබොක්ක කොටපොළ මාර්ගයේ ධාවනය වන පාසල් සේවා බස් රථයත් දිගු කලක් තිස්සේ රාත්‍රී කාලයේ ගාල් කිරීම සිදුවූයේ එම මහාමාර්ගය අයිනේය. පාසල් ළමුන් ප්‍රවාහනය කිරීමෙන් අනතුරුව එහි බස් රථය නතර කරන රියැදුරා (බස් හිමියා) නිවස බලා යාම සිරිත වේ.


සිරිත් පරිදි එදිනද උදෑසන සිසුන් පාසල් කරා රැගෙන යාමට පැමිණි බස් හිමියාට දැක ගන්නට ලැබුණේ ඇස් අදහාගත නොහැකි දර්ශනයකි. 


ලෑලි බාර් එකක් (ලෑලි කඩයක්) තම බස් රථය ඉදිරිපස අවුරා වසා ගෙන ඇති ආකාරයයි. බසය ගාල්කර තිබූ ස්ථානයට නුදුරින් පැවති සුළඟට ගැලවී ගසාගෙන විත් තිබූ මෙම ලෑලි බාර් එක බසයේ ගැටී ඉදිරිපස වීදුරුවද ලයිට්ද කුඩු පට්ටම් වී ගොස් තිබුණි.


ලෑලි බාර් එකේ තිබූ වීදුරු බෝතල්, පාරිභෝගික ද්‍රව්‍ය හා බඩු බාහිරාදිය ද මාර්ගය පුරා සීසීකඩ විසිරී තිබුණි.


බලවත් ලෙස කෝපයට පත් බස් හිමියා ලෑලි බාර් හිමියාට තදින් දොස් තබන්නට විය. පොලීසි යන බවට ද තර්ජනය කළේය. 


ලෑලි කඩ හිමියාද කටකාර පුද්ගලයෙකි. 


“බාර් එකක් ඇවිත් බස් එක හප්පල තියෙන්නෙ කොහේද? බස් එකක් ඇවිත් හප්පගෙන යනවා මිසක්” 


බස් හිමියාට කීමට දෙයක් නොතිබිණි. සිද්ධිය බැලීමට රොක්වූ පිරිසෙන් අයෙක්,


“නඩු දාන්න ඕන හුළඟට විරුද්ධවයි” පවසද්දී බස් රථ හිමියා හෙමින් මාරුවී ගියේය.