(උණවටුන ඩී.ජී. සුගතපාල)
ලක්ෂ ගණන් ගෙවා පැරණි භාණ්ඩ මිලදී ගන්නා බවට ගම පුරා කට කතාවක් පැතිර ගියේය. ලන්දේසි යුගයට අයත් වී.ඕ.සී. ලාංඡනය සහිත පැරණි පිඟන් භාණ්ඩ, ගෙම්බා මාක් මහන මැෂින් රුපියල් ලක්ෂ ගණන්වලට මිලදී ගන්නා බවද එම ආරංචියේ සඳහන් විය.


වැඩිදුටත් කියවුණේ ගාල්ල වරායට පැමිණ තිබෙන නැවක් ඒවා එකතු කරන බවය. මේ නිසා බොහෝ දෙනා කලබල වී පැරණි පලඟාන් ඇතුළු පිඟන් කෝප්පද ගෙම්බා ලකුණ මහන මැෂින්ද සොයන්නට වූහ. සමහරු තමන්ගේ නිවසේ තිබෙන පැරණි පිඟන් කෝප්පද සූදානම් කරගෙන සිටියේ ඒවා එකතු කරන්නට එනතුරුය. තවත් සමහරු ගමපුරා ඇවිදිමින් ගෙම්බා මාක් මහන මැෂින් සෙවූහ.


එහෙත් මේවා එකතු කරන්නට කිසිවෙකුත් පැමිණියේ නැත. නමුත් මේවා ලක්ෂ ගණන්වලට මිලදී ගන්නා බවට පැතිර ගිය කටකතාවේ නම් අඩුවක් නොවීය. මේ අතර සොහොයුරන් දෙදෙනකු කිසිවකුත් නොමැති අවස්ථාවක නිවසේ තිබූ පළඟාන අතට ගෙන මේක වික්කොත් ලක්ෂ ගණනක් ගන්න පුළුවනි අයියා කීවේය.


හැබැයි අම්මයි තාත්තයි දැන ගත්තොත් ඉඳල ඉවරයි. මල්ලී කීවේය. එසේ කීවත් දෙදෙනාටම මුදල් අවශ්‍ය වූ නිසා නිවසේ කිසිවෙකුත් නොමැති අවස්ථාවක ඔවුන් පළඟාන ඔතාගෙන බස් රථයක නැගී ගාල්ලට පැමිණ බඩු එකතු කරන නැව පිටත්ව යාමට පෙර එය විකිණීමට පැරණි බඩු එකතු කරන ස්ථානයකට ගිය ඔවුන් තමන් ගෙනා පළඟාන පෙන්නුවේ අඩු තරමින් රුපියල් ලක්ෂ දෙක තුනක්වත් බලාපොරොත්තුවෙනි. එය බැලූ පැරණි බඩු එකතු කරන්නා රුපියල් තුන් සියයක් දෙන්නම් කීවේය.


ඇයි මේවා ලක්ෂ ගණන්වලට ගන්න නැවක් ඇවිල්ල කියන්නේ අයියා ඇසුවේය.


අපොයි මහත්තය ඒ නැව ඊයේ ගියානේ. නැව තිබුණ නම් ලක්ෂ පහකට දෙන්න තිබුණා. කපටි වෙළෙන්දා කීවේය. දෙදෙනා පළඟානද තුරුල්කරගෙන ඉකිමණින්ම බසයට නැග්ගේ අම්මා ඒමට පෙර නිවසට යාමටය.