(උණවටුන - ඩී.ජී. සුගතපාල)

වේලාව සවස හයට පමණ ඇත. මාතර දෙස සිට කොළඹ දෙසට යාමට පැමිණි විදේශිකයන් ප‍්‍රවාහනය කරනු ලබන සුඛෝපභෝගී වෑන් රථයක් ආපසු හරවා ගාල්ල පලතුරු වෙළඳපොළ අසල නතර කළේය. රියැදුරා වාහනයෙන් බැස ගත්තේ පපුව අල්ලාගෙනය. ඔහු දැඩි පපුවේ වේදනාවකින් පෙළෙන්නට විය.

එතැනට රැස්වූ කිහිපදෙනකු ඔහුට ප‍්‍රථමාධාර දුන්හ. වෑන් රථයේ යතුරත්, මුදල් පසුම්බියත්, ජංගම දුරකථනයත් වෑන් රථය තුළ තිබෙන බව ඔහු පැවැසීය. ප‍්‍රථමාධාර දීමෙන් පසු ඔහු රෝහලට යැවීමට පිරිස කටයුතු කළහ.

ඔහුගේ ජංගම දුරකථනයේ තිබූ බිරිඳගේ අංකයට ද කතා කර සිද්ධිය කීවේය. එයට ටික වේලාවකට පසුව වෑන් රථයේ අයිතිකරු පැමිණියේය. ඔහු මහමෝදර පදිංචිකරුවෙකි. ඔහු වෑන් රථයේ දොර හැර එහි තිබූ මුදල් පසුම්බිය පරීක්ෂා කර බැලූවේය. අඩුම තරමින් එහි රුපියල් අට ලක්ෂ හාර දහසක් තිබිය යුතු බව ඔහු දන්නේය. එහෙත් සත පහක් නැත.

මෙම වෑන් රථය විදේශිකයන් ප‍්‍රවාහනය කරනු ලබන එකකි. ඔහු මෙසේ හදිසියේ අසනීප වී ඇත්තේ උණවටුනේ හෝටලයක සිටි විදේශික පවුලක් සමඟ සති තුනක සංචාරයක් සඳහා ගොස් පැමිණ ඔවුන් උණවටුනේ හෝටලයේ නවතා කුලිය වූ රුපියල් අට ලක්ෂ හාර දහසක් රැගෙන වාහනය අයිතිකරුගේ නිවෙසට යමින් සිටියදීය.

ඔහුට අසනීපයක් නොමැති බව පවසා පසුදින රෝහලෙන් ටිකට් කැපීමෙන් පසු පොලිසිය විසින් ඔහු අත්අඩංගුවට ගනු ලැබීය. ඔහු බණ්ඩාරවෙල ප‍්‍රදේශයේ පදිංචි තිස් අට හැවිරිදි පුද්ගලයෙකි. ඔහු සමඟ ගිය විදේශීය පවුල ද පොලිසියට පැමිණ කුලිය ලෙස රුපියල් අට ලක්ෂ හාර දහසක් දුන් බවට ලිඛිතව දුන්නේය. එම මුදල් බාරගත් බව ඔහු ද පිළිගත්තේය. එහෙත් මුදල් නැත.

අසනීප වූ අවස්ථාවේ එහි සිටි කෙනෙක් මුදල් සොරකම් කරන්නට ඇත යන අදහස අන් අය තුළ ඇති කිරීමේ බලාපොරොත්තුවෙන් කළ කපටි නුවණ වැරදී ගියේය. ගාල්ල පොලිසියේ විශේෂ අපරාධ විමර්ශන අංශයේ ස්ථානාධිපති ප‍්‍රධාන පොලිස් පරීක්ෂක සුජීව සිල්වා, උපපොලිස් පරීක්ෂක පාලිත රාමසිංහ යන මහත්වරුන් විසින් වැඩිදුර පරීක්ෂණ පවත්වාගෙන යනු ලබන අතර සේවකයකුව සිටිමින් විශ්වාසය කඩකිරීමේ චෝදනාව යටතේ සැකකරු අධිකරණයට ඉදිරිපත් කිරීමට නියමිතව තිබිණි.