(පුස්සැල්ලාව - නිහාල් කරුණාරත්න)
විදේශ ගත වී සිට පැමිණි බිරිය තම සැමියාට සරම වෙනුවට කලිසම අඳින්නට යැයි බල කිරීම නිසා ඊට උරණ වූ සැමියකු පුස්සැල්ලාව පොලිසියේ පැමිණිල්ලක් ගොනු කළේය. ඔහු මැදරට ප්‍රදේශයේ ජීවත් වන පුද්ගලයෙකි. වාර්තා වූ අන්දමට සිද්ධිය මෙසේය.

එම යුවළ වත්තේ කුලී වැඩ කරමින් ජීවත් වූ අය වෙති. ජීවත් වීම සඳහා වැඩි මුදලක් උපයා ගැනීමට බිරිය පසුව විදේශ ගත වී තිබේ. මැද පෙරදිග ගෘහ සේවිකාවක ලෙස කටයුතු කළ ඇය වසර කීපයක් ගත වීමෙන් පසු නිවසට පැමිණියාය. තරමක් මොඞ් වී සිටි ඇය තම ස්වාමියාට ද සරම වෙනුවට කලිසම අඳින්නට යැයි පවසා ඇත. එහෙත් තමන්ට හුරු පුරුදු සරම වෙනුවට කලිසම අඳින්නට එම පුද්ගලයා අකැමැත්ත පළ කර තිබේ. එම නිසා දෙදෙනා අතර ආරවුලක්ද හටගෙන තිබුණි. තම බිරිඳගේ කරච්චලය නිසා උරණ වූ එම පුද්ගලයා පුස්සැල්ලාව පොලිසිය වෙත ගොස් පැමිණිල්ලක් කළේය.

පුස්සැල්ලාව පොලිස් ස්ථානාධිපති සරත් බණ්ඩාර පලිපාන මහතාගේ උපදෙස් මත එම බිරිය හා සැමියා පොලිසිය වෙත ගෙන් වූ අතර එහිදී සුළු පැමිණිලි අංශයේ පොලිස් සැරයන් නිශාන්ත මහතා දෙදෙනා සමගි කොට පවුල් ජීවිතය සඳහා සැමියා සරම අඳින එක ප්‍රශ්නයක් කර නොගන්නා ලෙස කියා බිරියට අවවාදයක් දී ඇත.