(අකිල බද්දෙවිතාන)

අනුරාධපුර පැත්තේ වැඩබිමක සේවකයින්ගේ නවාතැන්පොළක සිදුවූ අපූරු සිදුවීමක් හේතුවෙන් හොඳින් දිවි ගෙවූ සැමියකු හා බිරියක විරසක වූ පුවතකි මේ.

මෙම වැඩපොළෙහි සේවකයන්ට නවාතැන් ගැනීම සඳහා එක පෙළට සකස් කළ නිවාස කිහිපයක් ලැබී තිබුණු අතර එක් නිවෙසක සැමියා සහ බිරිය වාසය කළහ. ඔවුන්ගේ අසල්වැසි නිවසේ සිටියේ ගුණගරුක යහපත් ගති පැවැතුම් ඇති තරුණයෙකි. මෙම තරුණයා සම්බන්ධයෙන් සියලූ දෙනා දැන සිටියේ කිසි දිනෙක මත්පැන් නොබොන දුරාචාරයේ නොයෙදෙන යහපත් කල් ක‍්‍රියාවෙන් යුතු වූවකු ලෙසිනි.

එබැවින් කාගේත් විශ්වාසය දිනා ගැනීමට මෙම තරුණයා සමත්ව සිටියේය. නමුත් දිනක් සිය මිතුරන්ගේ බලවත් පෙරැත්තය මත ජීවිතයේ පළමු වතාවට මත්පැන් තොල ගාන්නට සිදුවුණාලූ. ජීවිතයේ මුල්ම වරට අත්විඳි පදම ඔහුට වැඩිවීම නිසා හොඳහැටි මත්වූ තරුණයා ආපසු නිවෙස කරා ගියේ කඩිනමින් නිදා ගැනීමේ අපේක්ෂාව පෙරදැරිවය.

නමුත් තරුණයාට නිවෙස මාරු වී තිබිණි. ඔහු සිය නිවෙස යැයි සිතා ඇතුළු වී තිබුණේ අසල්වැසි අඹුසැමියන් වාසය කළ නිවෙසටය. ඒ මොහොතේ නිවෙසේ සිටියේ නිවෙස් හිමියාගේ බිරිය පමණි. ඒ සමඟ නිවෙසට ආ නිවෙස් හිමියාට දවල් තරු පෙනුණාලූ. වහාම පොලිසියට දුරකතන ඇමතුමක් දී තරුණයා පොලිසියට බාර දුන්නේ තම බිරියට කරදරයක් කිරීමට පැමිණියකු බව කියමින්ලූ.

නමුත් තරුණයා ගැන දන්නා නිවෙස් හිමියාගේ බිරිය ඔහු එවැනි නරක අදහසකින් නොපැමිණි බව කියමින් ඔහු මුදා හරින්නැයි පොලිසියෙන් ඉල්ලා සිටියාය. නමුත් ඇගේ සැමියා මේ පිළිබඳ විමතියට පත්ව බිරියට ද දොස් නගමින් මහා හඬින් කෑ ගැසීය. තරුණයා පැත්තක සිටිය ද අඹුසැමි යුවළ අතර විරසකය සංසිඳවීමට පොලිසියට බොහෝ වේලාවක් ගත වුණාලූ.