(බමුණාකොටුව එච්.එම්.එන්. හේරත්)
තම බෑනාගේ මංගල උත්සවයට යාම සඳහා පැසුණු කොණ්ඩය සහ රැවුල ඩයි කිරීමට ගිය මාමා කෙනෙකු විශාල අකරතැබ්බයකට ලක්වූ පුවතක් පිළිබඳව වාරියපොල ප්‍රදේශයෙන් වාර්තා වේ.

 
දුර බැහැර ප්‍රදේශයකින් මනාලිය කැඳවාගෙන ඒමේ මංගල උළෙලේ පෝරුවේ චාරිත්‍ර සඳහා ඇවැසි මාමාගේ භූමිකාව සඳහා කැඳවාගෙන යාමට නියමිතව තිබූ මාමා කොණ්ඩය සහ රැවුල කළු කිරීමට යාමේදී හදිසියෙන් රෝගාතුරවී ඇද වැටුණේ මනාල බැනාගේ සිහින බොඳ කරමිනි. 


මංගල උත්සවයට පෙර දින සැන්දෑවේ එහි යාම සඳහා දහවල් සූදානම් වීමට අදහස් කරගත් මාමා ලහි ලහියේ නිවස ළඟ වෙළෙඳසලකින් ඩයි පැකැට්ටුවක් මිලට ගෙන තම කොණ්ඩය සහ රැවුල කළුකර ගැනීමට පටන් ගත්තේ මංගල උළෙලේදී ආකර්ශනීය ලෙස පෙනී සිටීමටය. 


එහෙත් නොසිතූ අයුරින් එම ඩයි වර්ගය නිසා සංකූලතා තත්ත්වයක් ඇති වීමෙන් මාමා රෝහල්ගත කිරීමට සිදුවූයේ මංගල්ලයේ පැවරුණු රාජකාරියටද තිත තබමිනි. 


මාමාගේ රෝගී තත්ත්වය බරපතළ වූයෙන් පවුලේ අයගේද මංගල ගමන ඇනහිටියේය. 


මාමාගේ බිරිඳ අධික මුදලක් වැය කර සූදානම් කරගත් ඇඳුම් ආයිත්තමි වලින් පලක් නොවීම පිළිබඳව ඇය කම්පනයට පත්වූවාය. උදාවූ තත්ත්වයෙන් මහත් කලබලයට හා කම්පනයට පත් බෑනාට තම පෝරුවේ චාරිත්‍ර සඳහා ඇවැස්ස මාමාගේ භූමිකාව සඳහා වෙනත් මාමා කෙනෙකු සොයන්නටද සිදුවිය.