(මීරිගම විශේෂ - පුෂ්පකුමාර මල්ලවආරච්චි)

අල්ලපු ගෙදර බල්ලා රාති‍්‍ර කාලයේ නොකඩවා බුරන නිසා පාඩම් කිරීමට බාධා වෙන බැවින් පියවරක් ගන්නා ලෙස උපාධි අපේක්ෂිකාවක ග‍්‍රාම නිලධාරිවරයාගෙන් ඉල්ලා සිටි අවස්ථාවේ බල්ලාගේ බුරන ශබ්දය නොඇසෙන්නට නම් ඉයර්ෆෝන් යුගලයක් පාවිව්ච් කරන ලෙස දැන්වූ පුවතක් අලව්ව ප‍්‍රදේශයේ ගම්මානයකින් වාර්තාවේ.

ළඟදීම අවසන් වසරේ විභාගයට පෙනී සිටීමට නියමිත උපාධි අපේක්ෂිකාවගේ නිවසට යාබඳ නිවසකට අලූතින් බල්ලකු ගෙන ආවේ මෑතකදීය. දහවල් කාලයේ නිදහසේ නිවස තුළ සැරසරන බල්ලා රාති‍්‍රයේදී නිවසින් පිටත වැට මායිමට ආසන්න තැනක බැද දැමීමට නිවැසියෝ කටයුතු කළහ.

දහවල නිවී සැනසිල්ලේගේ ඇතුළත ගතකරන බල්ලා රාති‍්‍රයට කාන්සිය මකා ගැනීමට නිතර මහ හඬින් බුරන්නට වීම අසල්වාසීන්ට කරදරයක් විය. වැඩිපුරම කරදරයකට පත්වූයේ රාති‍්‍ර කාලයේ පාඩම් කරන උපාධි අපේක්ෂිකාවටය. නිවැසියන්ට මේ ගැන කීපවිටක්ම දැන්වූවත් පලක් නොවූ තැන ප‍්‍රදේශයේ ග‍්‍රාම නිලධාරිට පැමිණිලි කළේ වෙන කළ හැකි දෙයක් නැති තැනය.

ග‍්‍රාම නිලධාරි දිනක් සවස පැමිණ ගියාට පසුදින කිහිපයක් බල්ලා නිවස ඇතුළත තබා ගැනීමට නිවැසියන් පියවර ගත් අතර කාටවත් කරදරයක් වූයේද නැත. දින කිහිපයක් ඇවෑමෙන් යළිත් බල්ලා සුපුරුදු ලෙස නිවසින් පිටත බැද දමන්නට වූ අතර උගේ බිරුම් හඬ රාති‍්‍ර පුරාම ගිඟුම් දෙන්නට වූයේය. මේ බල්ලා බැද දමන ස්ථානයත් තරුණිය පාඩම් කරන නිවසත් අතර දුර ප‍්‍රමාණය මීටර් හත අටක් තරම් සමීපය.

නැවත ඇතිවූ බලූ බිරුම් කරදරය ගැන තරුණිය ග‍්‍රාම නිලධාරිට දැනුම් දුන්නේය. ඒ ගොල්ලො බල්ලට කටකලියාවක් දාන්නම් කිව්වා. ඒක බල්ලාට කරදරයක් බව පැවසූ ග‍්‍රාම නිලධාරියාගෙන් ලැබුණේ අපූරු උපදෙසකි. ‘‘ ඕව නවත්වන්න නීතිරීති නැහැ. බල්ලා බුරන එක කරදරයක් නම් ඔයා ඉයර්ෆෝන් දෙකක් කනේ ගහගෙන පාඩම් කරන්න’’ එසේ පාඩම් කරන්නේ කෙසේ දැයි කියා ග‍්‍රාම නිලධාරීවරයා තරුණියට කියාදී නැත.