(දූනගහ බටේපොල විජයසිරි)
තරුණයකුට හෙල්මටයකින් පහරදී එය කැඩුණා යයි පහර කෑ තරුණයාගෙන් අලාභය ඉල්ලීමේ පුවතක් දිවුලපිටිය කුඩගම්මන ප්‍රදේශයෙන් වාර්තාවේ. සිද්ධිය සැකෙවින් මෙසේය.


ක ු ඩ ග ම් ම න ප්‍රදේශයේ ඇඟළුම් කම්හලක සේවය කරන තරුණියකගෙන් වෙනත් තරුණයකු දුරකතන අංකය ඉල්ලා තිබේ. ඇය දුරකතන අංකය ඉල්ලු පුද්ගලයාට අංකය නොදී තම පෙම්වතාට මේ බව පවසා ඇත. පෙම්වතා පසුදින එම ඇඟළුම් කම්හල අසලට ගොස් දුරකථන අංකය ඉල්ලූ අයගෙන් ඒ ගැන විමසා ඇති අතර ඒ අවස්ථාවේදී ඔහු තරුණියගේ පෙම්වතා සමග ගැටුමක් ඇති කරගෙන ඇත.


දෙදෙනා අතර වචන හුවමාරුව දුරදිග ගොස් ගුටිබැට හුවමාරුවකට පරිවර්තනය වී දුරකතන අංකය ඉල්ලා සිටි තරුණයා තරුණියගේ පෙම්වතාට හෙල්මටයෙන් එය කැඩෙන තුරුම පහර දී ඇත.


අවසානයේ හෙල්මටයෙන් ගැසූ පුද්ගලයා කැඩුණු හෙල්මටයද රැගෙන පොලිසියට ගොස් පැමිණිලි කර ඇත්තේ පහර කෑ පුද්ගලයාගෙන් හෙල්මටයේ අලාබය ඉල්ලා දෙන ලෙසය.


පහර කෑ පුද්ගලයා දිවුලපිටිය රෝහලේ ප්‍රතිකාර ලබා පසුව දිවුලපිටිය පොලිසියට සිද්ධිය පැමිණිලි කර ඇත. පොලිසිය වැඩිදුර පරීක්ෂණ සිදු කරයි.