තම විවාහක ස්වාමි පුරුෂයා සම්බන්ධයෙන් ඇතිවූ සැකයක් නිසා ඔහුට අපූරු දඬුවමක් දුන් තරුණ බිරියක් පසුව පැමිණ පොලිසියට බාරවූ බව හලාවත පොලිසිය කියයි.


හලාවත ඉරණවිල ධීවර ගම්මානයේ පදිංචි 32 වැනි වියේ පසුවන තරුණ එක් දරු මවක වූ කාන්තාවක් තමන් තම සැමියාගේ රහසඟට පිහි පහරක් එල්ල කර ඊට හානි පැමිණවූ බව කියමින් පොලිසියට බාර වී ඇති බවත් ප්‍රශ්න කිරීමේ දී තම සැමියා අනියම් බිරියන්ගේ පහස සොයා යන බැවින් නිතර ඔහුට තමා අවවාද කළ බවත් එහෙත් එම අවවාදවලින් සැමියා යහමගට නොපැමිණි නිසා තමන් පිහියක් ගෙන ඔහුට මෙම දඬුවම දුන් බවත් පොලිසියට පවසා ඇත.


මේ අතර මෙම බිරියගේ ස්වාමි පුරුෂයා බව කියන පුද්ගලයා තම රහසඟ කැපී තුවාලයක් සිදුවූ බව කියා ප්‍රතිකාර සඳහා හලාවත දිස්ත්‍රික් මහ රෝහලට ඇතුළත් වූ බව රෝහල් පොලිසිය ද කීය.


සැමියාගේ තත්ත්වය බරපතළ නොවන අතර ඔහු ශල්‍ය කර්මයකට භාජනය කිරීමට නියමිත බවත් රෝහල් ආරංචි මාර්ග පැවැසීය. 
(හලාවත - ඔගස්ටින් ප්‍රනාන්දු)