(තිහගොඩ උපසේන ලියනගම)
මාතර මහ රෝහලේ දැඩි සත්කාර ඒකකයට පසුගියදා වයස අවුරුදු එකොළහක පමණ වූ දරුවකු ඇතුළු කළේ ඩෙංගු රක්තපාතය වැළඳීමේ හේතුවෙනි. දැඩි රෝගී තත්ත්වයෙන් පසුවූ දරුවා සිටියේ සිහිසුන්වය.


දින තුනක ප්‍රතිකාරවලින් දරුවා කෙමෙන් සුවය ලැබීම වෛද්‍යවරුන්ගේ සතුටට හේතුවිය. ඇස් ඇර වටපිට බැලූ ඔහුගෙන් වෛද්‍යවරු හා හෙදියෝ එක්ව තොරතුරු විමසූහ.


මොහොතකින් එතැනට දිව ආ මවට බලවත් සතුටක් ඇතිවිය. ඇය වහා ආපසු දිවගියේ දරුවාට කෑම හෝ බීම ගෙන ඒමට යැයි සිතූ හෙදියන් දැනට කෑම දෙන්න එපා බීම පොඞ්ඩක් නම් දුන්නට කමක් නෑ කීවාය.


එළියට දිවගිය මව ආපසු ආවේ කෑම හෝ බීම රැගෙන නොව ශිෂ්‍යත්ව විභාග සඳහා වූ පුවත්පතක් ඇතැතිවය. පුතේ මේක බලන්න. ඇය කී විට අවට සිටි වෛද්‍යවරයාට හා හෙදියට දෙවියන් සිහිවුණා ලු.