(කටුගස්තොට - ධම්මික ගුණවර්ධන)
අලුත ගෙනා මනමාලියගේ හිත සතුටු කිරීමට මහමඟ සිටි බළල් පැටවකු රැගෙන ඒමට ගිය පුද්ගලයකුට ඇඳ සිටි සරම ද නොමැතිව පණ කෙන්ද රැක ගැනීමට නිවසටම දිව යාමට සිදුවූ පුවතක් මහනුවරට තදාසන්න තේ වතු ආශ්‍රිත ප්‍රදේශයකින් වාර්තා වේ.


වාර්තාවන අන්දමට සිද්ධිය සැකවින් මෙසේය.


මනාලිය තම නිවසට කැන්දාගෙනවිත් තවමත් ගතව ඇත්තේ මාසයකටත් අඩු කාලයකි. තේ වත්තේ වැඩ කරන ඔහු නගරයට ගිය හැමවිටම මනාලියගේ සිත සතුටු කිරීමට කැවිළි පෙවිළි මෙන්ම විසිතුරු බඩු ද රැගෙන එන්නේය.


මේ අතර ඉකුත් දිනක නගරයට ගිය ඔහු ඇයට අවශ්‍ය බඩු බාහිරාදිය මෙන්ම නිවසට අවශ්‍ය අඩුම කුඩුම ද රැගෙන බරට බරේ පැමිණියේ එදින සති අන්ත නිවාඩු දිනයක් ද වූ බැවිනි.


පා ගමනින්ම තේ වතු මැදින් එන අතරතුර මහමඟ අයිනේ සිටි බළල් පැටවකු ඔහු අතට ගත්තේ තම බිරියගේ සිත තව තවත් සතුටු කිරීමේ අදහසනි.


කෙසේ නමුත් එම සිතුවිල්ලෙන් අඩි දෙක තුනක් යාමටත් මත්තෙන් ඔහුගේ ඇඟට කඩා පැන්න හඳුන් දිවියකු නිසා අතැතිව සිටි පැටියාත් ගෙනා බඩු බාහිරාදිය සමඟ ඇඳ සිටි සරම ද එහි දමා පණ කෙන්ද බේරා ගැනීමට නිවසට දුවන අතර තමන් බළල් පැටවකු යැයි සිතා රැගෙන ඇත්තේ හඳුන් දිවි පැටවකු බව වැටහුණේය.