(නිකවැරටිය - ප්‍රියාණි මංගලිකා)
තරුණයින් දෙදෙනකු තරුණියක ද රැගෙන ඉකුත් 10 දා රාත්‍රී 12ට පමණ යතුරුපැදියකින් යමින් සිටියදී නම්මුවාවේදී පොලිසිය දැක තරුණිය සහ යතුරුපැදිය ද මග දමා පළාගිය පුවතක් රස්නායකපුර පොලිසියෙන් වාර්තා වෙයි.


මෙදින රාත්‍රියේ මාර්ග සෝදිසියේ සිටි නිලධාරීන් දෙදෙනා තරුණයින් දෙදෙනා පැමිණි යතුරුපැදිය නම්මුවාව ප්‍රදේශයේදී සෝදිසි කිරීම සඳහා නැවැත්වූ අවස්ථාවේ තරුණයින් දෙදෙනා මෙලෙස ගොස් ඇත.


වයස අවුරුදු 18 සහ 22 වයස්වල පසුවන තරුණයින් දෙදෙනා එකම පවුලේ අයියා, මල්ලී වන අතර, ඔවුන් සමඟ සිටි තරුණිය (18) මල්ලීගේ පෙම්වතිය බව ද මල්ලී විසින් මෙදින ඔහුගේ පෙම්වතිය නිවෙසින් පන්නාගෙන රාත්‍රියේ අයියාගේ යතුරුපැදියෙන් තම නිවෙසට යමින් සිටියදී මෙලෙස පොලිසිය දැක පැනගොස් ඇති අතර පසුව අයියා මලෝ දෙදෙනා පොලිසිය විසින් අත්අඩංගුවට ගනු ලැබූහ.


පසුව සිදුකළ වැඩිදුර පරීක්‍ෂණවලදී තරුණයින් දෙදෙනා රස්නායකපුර ප්‍රදේශයේ පදිංචි අය බව ද තරුණිය දණ්ඩුවාව ප්‍රදේශයේ පදිංචිකාරියක බව ද මල්ලීට තම පෙම්වතිය සමඟ හොරෙන් පැන යාම සඳහා උදව්වට අයියා පැමිණ ඇති බව අනාවරණය වූ බව ද පොලිසිය සඳහන් කරයි.


පසු දින ඔවුන්ගේ මව්පියන් දෙපාර්ශ්වයම කැඳවා දරුවන් බාර දී ඔවුන් නීත්‍යනුකූලව විවාහ කරවීමට ද උපදෙස් දී පිටත් කර යැවූ බව ද පොලිසිය සඳහන් කරයි.


කොට්ඨාස බාර පොලිස් අධිකාරී උපුල් චන්දන මහතාගේ උපදෙස් අනුව සහකාර පොලිස් අධිකාරී සමරකෝන් බණ්ඩාර මහතාගේ අධීක්‍ෂණයෙන් ස්ථානාධිපති ප්‍ර.පො.ප. මඩවල මහතාගේ මෙහෙයවීමෙන් අපරාධ අංශ ස්ථානාධිපති උ.පො.ප. හේවාවසම්, පො.සැ. මධුශංක (36237), පො.කො. ඉන්දික (23605) යන නිලධාරීහු පරීක්‍ෂණ පවත්වති.