කුමන පැතිමාන ඔස්සේ බැලුවද, පොදු අපේක්ෂකයා යථාර්ථයක් කරවීමත් ඒ පොදු අපේක්ෂකයා මෛත්‍රී ඇමතිතුමා වීමත් පිටුපස චන්ද්‍රිකා කුමාරතුංග මැතිනිය ඉටු කළ මහා කාර්ය භාරයද ඉතා වැදගත්ය. එතුමිය එම කාලවකවානුව තුළ පෙන් වූ දේශපාලන පරිණත බව, බුද්ධි ප්‍රභාව හා විචක්ෂණ බව සියලු දෙනාම ප්‍රශ්න කිරීමකින් තොරව පිළිගත්තා වැනිය. චන්ද්‍රිකා මැතිනිය සම්බන්ධයෙන් ශ්‍රී.ල.නි. පාක්ෂික මනෝභාවය බිඳී ගිය ආකාරය පිළිබඳ කෙරෙන සියුම් මනෝ විද්‍යාත්මත විග්‍රහයකදී පෙනී යන්නේ 2010 ජනාධිපතිවරණයට පෙරදින සරත් ෆොන්සේකා මහතා හොරගොල්ල සමාධියට ගොස් පුෂ්පෝපහාර දැක්වීමෙන් අනතුරුව හොරගොල්ල වලව්වට ගොස් චන්ද්‍රිකා මැතිනිය මුණ ගැසීම ඊට ප්‍රධාන හේතුවක් වූ බවයි.


සැබවින්ම එහිදී සිදු වූයේ එම ජනාධිපතිවරණ ප්‍රචාරක කටයුතු අතරතුර අවස්ථා පහ හයකදී පමණ සරත් ෆොන්සේකා මහතා දුරකථනය මගින් චන්ද්‍රිකා මැතිනිය සම්බන්ධ කර ගැනීමට උත්සාහ කළ අතර අවසානයේදී එතුමිය සරත් ෆොන්සේකා මහතාට ප්‍රතිචාර දක්වා ඇත. එහිදී ෆොන්සේකා මහතා එතුමියගෙන් සහයෝගය ඉල්ලා ඇත. නමුත් චන්ද්‍රිකා මැතිනියගේ පිළිතුර වූයේ තමා නිහඬව සිටීමට තීරණය කර ඇති බවයි. කෙසේ වෙතත් ජනාධිපතිවරණයට දින දෙකකට පමණ පෙර ටිරාන් අලස් මහතා කථා කොට “මැඩම් ජනරාල් හොරගොල්ල සමාධියට එන්න තීරණය කර තිබෙනවා. එහිදී වැඩම්ව මුණ ගැසෙන්නත් බලාපොරොත්තු වෙනවා” යනුවෙන් පවසා ඇත. මෙම සිදුවිම ඒ ආකාර විය. 


අඛණ්ඩව වසර 17ක් විපක්ෂයේ සිට ශ්‍රී.ල.නි.පය. යළි ජයග්‍රාහී මාවතට පිවිසියේ චන්ද්‍රිකා මැතිනියගේ ආගමනයත් සමගය. 1993 පළාත් සභා මැතිවරණයෙන් බස්නාහිර පළාත් සභාවේ මහ ඇමතිනිය වූ ඇය 1994 මාර්තු මාසයේ දී ප්‍රැන්සිස්කුකරණයට ලක් වූ දකුණු පළාත් සභාව ජයග්‍රහණය කරවීමේ පුරෝගාමී කාර්ය භාරය ඉටු කළාය. ඊට පෙර විපක්ෂයේ මන්ත්‍රීවරයකු වශයෙන් මහින්ද රාජපක්ෂ මහතා “පාද යාත්‍රා” හා “ජනඝෝෂා” කර තිබුණද 1993 පළාත් සභා මැතිවරණයේදී හම්බන්තොට දිස්ත්‍රික්කයේ මැතිවරණ කොට්ඨාස 4 ම පරාජයට පත් වෙයි. නමුත් 1994 දකුණු පළාත් සභා මැතිවරණයේදී හම්බන්තොට දිස්ත්‍රික්කය ප්‍රමුඛ සමස්ත දකුණු පළාතේම ජයග්‍රාහී මැතිවරණ ව්‍යාපාරයට නායකත්වය දෙන්නේ බස්නාහිර මහ ඇමතිනිය ලෙස චන්ද්‍රිකා මැතිනියයි. 


එවර පොදු ජන එක්සත් පෙරමුණ පළාතේ දිස්ත්‍රික් තුනෙහි මැතිවරණ කොට්ඨාස 21 අතුරින් බළපිටිය හැර අන් සියලුම මැතිවරණ කොට්ඨාස අතිවිශිෂ්ට ලෙස ජයගනී. ඇයගේ නායකත්වයෙන් මහ මැතිවරණ 3ක් ශ්‍රී.ල.නි.ප.ය ප්‍රමුඛ පෙරමුණ හා සන්ධාන ජයගෙන ඇති අතර මහින්ද රාජපක්ෂ ජනාධිපතිතුමාට ශ්‍රී.ල.නි.ප.ය හා සන්ධානය වෙනුවෙන් ජයගත හැකි වූයේ 2010 මහ මැතිවරණය පමණි. මහින්ද රාජපක්ෂ මහතා 2005 දී ජනාධිපති අපේක්ෂකයා වූයේ බලයේ සිටි ශ්‍රී.ල.නි.පය. ප්‍රමුඛ සන්ධානය තුළින් වූ අතර චන්ද්‍රිකා මැතිනිය විසින් 2004 දී ගොඩ නැගූ එ.ජ.නි.ස. ආණ්ඩුව 2010 දක්වාම ගමන් කළේය. නමුත් අවාසනාවකට මෙන් 2005 ජනාධිපතිවරණ ජයග්‍රහණයෙන් පසු ශ්‍රී.ල.නි. පක්ෂ කාර්යාලයේ සිට සියලු පක්ෂ කටයුතුවලදී චන්ද්‍රිකා මැතිනියගේ ඡායාරූපය ප්‍රදර්ශනය කිරීම පවා තහනම් කරන ලදී. තවද කලක පටන් සම්ප්‍රදායක්ව පැවති පක්ෂයේ මධ්‍යම කාරක සභාව ආරම්භයේදී බණ්ඩාරනායක ශ්‍රීමතාණන් හා මැතිනිය සිහි කරමින් පවත්වනු ලබන විනාඩියක නිශ්ශබ්දතාව න්‍යාය පත්‍රයෙන් කපා හරින ලදී. 


2003 අග භාගයේදී ශ්‍රී.ල.නි.ප.ය. ජනතා විමුක්ති පෙරමුණ සමග එක්ව එක්සත් ජනතා නිදහස් සන්ධානය ගොඩනගන අවස්ථාවේදී මංගල සමරවීර, අනුර බණ්ඩාරනායක හා ලක්ෂ්මන් කදිරගාමර් යන පිරිස සුවිශේෂී කාර්ය භාරයක් ඉටු කළහ. ආරම්භයේදී ජනාධිපතිනි චන්ද්‍රිකා මැතිනිය මෙම නව සන්ධානයට එතරම් කැමැත්තක් නොදැක් වුවද අවසානයේ දී එතුමිය ද ඊට අනුකූලතාව පළ කළාය. ඒ අනුව මෙම නව දේශපාලන සන්ධානයට එතරම් කැමැත්තක් නොදැක් වුවද අවසානයේදී එතුමිය ද ඊට අනුකූලතාව පළ කළාය. ඒ අනුව මෙම නව දේශපාලන සන්ධානය නීත්‍යනුකූලව ලියාපදිංචි කිරීමේ ක්‍රියාවලියේ දී ජනාධිපතිනිය ඊට මූලික වී ක්‍රියා කළාය. එහිදී එතුමියටද සබඳතා පැවැති බහුජන නිදහස් පෙරමුණ මෙලෙස එක්සත් ජනතා නිදහස් සන්ධානය ලෙසට පරිවර්තනය කරනු ලැබීය. එම සන්ධානයේ ලකුණ වූ බුලත් කොළය සම්පූර්ණයෙන්ම චන්ද්‍රිකා මැතිනියගේ නිර්මාණයකි. කුඩා කල සිට ඉතා දක්ෂ ලෙස චිත්‍ර ඇඳීමේ දක්ෂතාවක් දැක් වූ ඇය එ.ජ.නි.ස. ගොඩනැගීම පිළිබඳ පැවති අවසන් සාකච්ඡාවක් අතරතුර කඩදාසියක් අතටගෙන තම අතෙහි වූ පෑනෙන් අඳින ලද බුලත් කොළයක්, අසල සිටි සුසිල් ප්‍රේමජයන්ත ඇමතිතුමාට ලබා දුන් අතර මෙම ලකුණ මැතිවරණ කොමසාරිස් කාර්යාලයේ ලියාපදිංචි කරන ලෙස දැන්වීය. එතැන් පටන් 2015 ජනවාරි 8 වැනිදා තෙක් අපරාජිත වූ එක්සත් ජනතා නිදහස් සන්ධානයේ බුලත් කොළය ලකුණ බිහිවෙන්නේ එලෙසය. 


2005 ජනාධිපතිවරණය සඳහා තරග කිරීමට අනුර බණ්ඩාරනායක මහතාට අවශ්‍ය විය. එහිදී අනුර පිටුපස ශ්‍රී.ල.නි.පයේ. විශාල පිරිසක් සිටියහ. නමුත් චන්ද්‍රිකා මැතිනිය හා සුනේත්‍රා මැතිනිය දිනක් උදෑසන ආහාර මේසයට අනුර බණ්ඩාරනායක මහතාට ආරාධනා කොට ජනාධිපතිවරණය තරග කිරීමට ඇති අදහස ඉවත් කර ගන්නා ලෙසට ඉල්ලා සිටියහ. ඒ අනුව අනුර ඊට එකඟ විය. 
නමුත් රාත්‍රියේදී චන්ද්‍රිකා මැතිනියගේ නිවසට පැමිණි බොහෝ ජ්‍යෙෂ්ඨයින් ඇයගෙන් උදක්ම ඉල්ලා සිටියේ මහින්ද රාජපක්ෂ මහතාට නාම යෝජනා ලබා නොදෙන ලෙසයි. නමුත් ඒ කිසිවකුට ඒ වන විට රනිල් වික්‍රමසිංහ මහතාට අභියෝගයක් කළ හැකි විකල්ප අපේක්ෂකයකු නොවීය.

සකස් කළේ : 
ප්‍රසන්න සංජීව තෙන්නකෝන්