නිමල කොඩිතුවක්කු
 
ශ්‍රී ලංකාවේ  සංවර්ධන  ක්‍රියාවලිය ශක්තිමත් කිරීම සඳහා රුපියල් කෝටි 8000ක ප්‍රදානයක් ලබාදීමට ඇමෙරිකා එක්සත් ජනපද සහයෝගිතා ව්‍යාපෘති කාර්යාලය පියවර ගෙන ඇති බව ජාතික ප්‍රතිපත්ති සහ ආර්ථික කටයුතු රාජ්‍ය ඇමැති නිරෝෂන් පෙරේරා මහතා  පැවසීය.


ඉඩම්, ප්‍රවාහන, කෘෂිකර්ම, උසස් අධ්‍යාපන සහ විදුලිබල යන අංශවල සංවර්ධනය වෙනුවෙන් මෙම ප්‍රදානයන් යෙදවීමට යෝජිත බවද රාජ්‍ය ඇමැතිවරයා මාධ්‍ය හමුවේ විශේෂ ප්‍රකාශයක් සිදුකරමින් සඳහන් කළේය.


යෝජිත සංවර්ධන ව්‍යාපෘති පිළිබඳව අමාත්‍ය මණ්ඩල අනුමැතිය ලැබීමෙන් පසු අගැමැති කාර්යාලය මගින් ඇමෙරිකා එක්සත් ජනපද සහයෝගිතා ව්‍යාපෘති කාර්යාලය සමඟ අවසන් අදියරේ සාකච්ඡා සිදු කරමින් පවතින බවද ඔහු කියා සිටියේය.


මෙම කෝටි 8000ක යටිතල පහසුකම් සංවර්ධන ව්‍යාපෘතිය පිළිබඳ අදාළ ගිවිසුම් ශ්‍රී ලංකා රජය සහ ඇමෙරිකානු එක්සත් ජනපද සහ සහයෝගිතා ව්‍යාපෘති කාර්යාලය අතර එළඹෙන දෙසැම්බර් මාසයේ දී අත්සන් තැබීමට නියමිතය.


යෝජිත සංවර්ධන ව්‍යාපෘති වලට අනුව  මෙම මුල්‍ය ප්‍රධානයන්ගෙන් අවිස්සාවේල්ල සිට පැල්මඩුල්ල දක්වාත්, බෙරගල සිට වැල්ලවාය දක්වාත් නාවුල සිට දඹුල්ල දක්වා සහ දඹුල්ල සිට තලගහවැව දක්වා මාර්ග රැසක් සංවර්ධනය කිරීමට නියමිත බවද පැවසීය.


මෙයට අමතරව දිවයින පුරා සමස්ත ප්‍රවාහන පද්ධතියම ආවරණය වන පරිදි රාජ්‍ය සහ පෞද්ගලික අංශය එකාබද්ධව නවීකරණ වැඩසටහන් සහ කොළඹ ඇතුළු නාගරික ප්‍රදේශ ආශ්‍රිතව රථවාහන නියාමන ක්‍රියාවලියක් ක්‍රියාත්මක කිරීමද සිදුවේ.