(අංජුල මහික වීරරත්න)

ඇමරිකා එක්සත් ජනපද ආර්ථිකය ශක්තිමත් වීමත් සමඟම දිනෙන් දින ඉහළ යන ඩොලරයේ අගය වැඩිවීමට මුහුණ දෙමින් ශ්‍රී ලංකාවේ අපනයන ආර්ථිකය කඩිනමින් ඉහළ දැමීමේ වැඩපිළිවෙලක් සකස් කරමින් සිටින බව රජයේ ජේෂ්ඨ ප්‍රකාශකයෙක් පැවැසීය.

අග්‍රාමාත්‍ය රනිල් වික්‍රමසිංහ මහතාගේ උපදෙස් මත ශ්‍රී ලංකාවේ සිටින ඉහළම මට්ටමේ ආර්ථික විශේෂඥයින් මේ කාර්යයයේ නිරතව සිටිම විශේෂත්වයකි.

ඩොලරයට සාපේක්ෂව රුපියල අවප්‍රමාණය වීම පාලනය කිරීමට ඉන්දියාව ගත් ක්‍රමවේදය අසාර්ථකවීමත් සමඟ නව ක්‍රමවේදයකට රුපියලේ අගය පාලනය කිරීමට කටයුතු කළ යුතු බව ඉහත ආර්ථික විශේෂඥ කණ්ඩායමේ මතය වී පවතියි.

ඩොලරයේ අගය උපරිම වශයෙන් ඉහළ ගොස් නතර වන තීරණාත්මක අගයේදී රුපියල ආරක්ෂා කර ගැනීම සඳහා ගතයුතු පියවර රජයට නිර්දේශ කිරීම ආර්ථික විශේෂඥ කණ්ඩායමේ ප්‍රධාන කර්යය වී තිබේ.

ඉහළ අගයක් සහිත ඩොලර් හැකි තරම් රට තුළට ගෙන ඒම සඳහා කෙටිකාලීන, මධ්‍ය කාලීන හා දීර්ඝ කාලීන අපනයන වැඩි කර ගැනීමේ ක්‍රමවේදයද ඉහත ආර්ථික විශේෂඥ කණ්ඩායම රජයට යෝජනා කිරීමට නියමිතය.