(හර්ෂණ තුෂාර සිල්වා)

ආනයනික මුද්‍රණ කඩදාසිවල මිල ගණන් ඉහළ යෑමත් රුපියල අවප්‍රමාණය වීමත් නිසා පුවත්පත් කර්මාන්තය දැඩි අර්බුදයකට මුහුණ දී ඇතැයි ශ්‍රී ලංකා පුවත්පත් ආයතනයේ සභාපති කුමාර් නඬේෂන් මහතා පැවැසීය.

ජනතාවට නිරවද්‍ය පුවත් සැපයීමේදී පුවත්පත් අන් මාධ්‍යවලට වඩා ඉදිරියෙන් සිටින බවත් එම කාර්ය ඉදිරියටත් අපහසුතාවකින් තොරව කරගෙන යෑම සඳහා බදු පිළිබඳ නැවත වරක් සැලකිලිමත් වන්නැයි ඉල්ලා සිටින බවත් කුමාර් නඬේෂන් මහතා කීය.

මාධ්‍ය නිදහස හා සමාජ වගකීම පිළිබඳ කොළඹ ප්‍රකාශනයට වසර 20ක් සපිරීම නිමිත්තෙන් පැවැත්වෙන ජාත්‍යන්තර සමුළුව නිල වශයෙන් ආරම්භ කිරීම වෙනුවෙන් කොළඹ සිනමන් ග්‍රෑන්ඞ් හෝටලයේ පැවැති උත්සවයට සහභාගී වෙමින් අමාත්‍යවරයා මහතා ඊයේ (27) පස්වරුවේ ඒ බව සඳහන් කළේය.

උත්සව සභාව ඇමතූ ශ්‍රී ලංකා පුවත්පත් ආයතනයේ සභාපති කුමාර් නඬේෂන් මහතා මෙසේ ද කීය.

     “පුවත්පත් කවුන්සිලය සහ අධිකරණයට අපහාස කිරීම සම්බන්ධයෙන් නැවත සලකා බැලීමක් කරන්නැයි මා මෙහිදි සිහිපත් කරනවා. මාධ්‍යවේදීන්ට එරෙහිව දියත් වූ පරීක්ෂණ සම්බන්ධයෙන් මා සිහිපත් කරන්න කැමැතියි. ඒ ගැන නැවත වරක් අවධානය යොමු කළ යුතුව තිබෙනවා.

ඒ වගේම මාධ්‍ය නිදහස වෙනුවෙන් අග්‍රාමාත්‍යවරයා තරුණයකුව සිටියදී ආරම්භ කරන ලද සටන අඛණ්ඩව කරගෙන යන ලෙස ද ඉල්ලා සිටිනවා. 

ආනයනය කරන මුද්‍රණ කඩදාසිවල මිල ගණන් ඉහළ ගොස් තිබෙනවා. රුපියල අවප්‍රමාණය වෙමින් තිබෙනවා. මේ තත්ත්වය නිසා කර්මාන්තය දැඩි අර්බුදයකට මුහුණ දී තිබෙනවා.

මේ පනවා තිබෙන බදු පිළිබඳ නැවත සලකා බැලීමක් කරන්නැයි මා ඉල්ලා සිටිනවා. විශේෂයෙන්ම සෙස් බද්ද, වැට් සහ වරාය අධිකාරිය මගින් පනවන ලද බදු පිළිබඳ නැවත සලකා බැලීමක් කරන්නැයි මා ඉල්ලා සිටිනවා. පුවත්පත් අනෙක් මාධ්‍ය වේදිකාවලට වඩා ගුණාත්මකභාවයෙන් ඉහළ පුවත් සැපයීමක් කරනවා. ජනතාවට විශ්වාසනීය ආකාරයෙන් පුවත් සපයනවා.

ඒ නිසා මේ බදු පිළිබඳ නැවත සලකා බැලුවහොත් අපට අපේ කාර්යය වඩාත් පහසුවෙන් කරන්න පුළුවන්.

ජනතාවගේ අභිවෘද්ධිය වෙනුවෙන් ජනාධිපති ට්‍රම්ප් ද කැනේඩියානු පුවත්පත් මුද්‍රණ කඩදාසිවලට පනවා තිබූ සියලු බදු අඩු කළ බව මම මෙහිදි සිහිපත් කරනවා”.

(ඡායාරූප - රොමේෂ් ධනුෂ්ක සිල්වා)