(ඩයනා උදයංගනී)
 
එන්ටර්ප‍්‍රයිස් ශ්‍රී ලංකා වැඩසටහන යටතේ ප‍්‍රතිලාභ හිමිවන පිරිස පුළුල් කිරීමට අමාත්‍ය මණ්ඩල අනුමැතිය හිමිවී තිබේ.
 
ඒ අනුව තාක්‍ෂණික ක්ෂේත්‍රයේ  රැකියාවල නියුතුව සිටින අයට, ජාතික වෘත්තීය සුදුසුකම් (එන්.වී.කියු) 5,6 හා 7 මට්ටම් සපුරා ඇති වෘත්තිකයින්ට, සුළු පරිමාණ සත්ත්ව පාලන අංශවල නියුතු අයට, දිරාපත්වන ද්‍රව්‍ය භාවිත කරමින් විවිධ ද්‍රව්‍ය නිෂ්පාදනය කරන්නන්ට සහ ළමා සුරැකුම් මධ්‍යස්ථාන ආරම්භ කිරීමට බලාපොරොත්තු වන අයට ඉදිරියේදී මෙම වැඩසටහන යටතේ ක‍්‍රියාත්මක වන සහන ණය යෝජනාවල ප්‍රතිලාභ ලබාදීමට කටයුතු කරන බව සම කැබිනට් ප‍්‍රකාශක, ඉඩම් හා පාර්ලිමේන්තු කටයුතු අමාත්‍ය ගයන්ත කරුණාතිලක මහතා පැවසීය.
 
මේ සඳහා මුදල් හා ජනමාධ්‍ය අමාත්‍ය මංගල සමරවීර මහතා   ඉදිරිපත් කළ යෝජනාවකට අමාත්‍ය මණ්ඩල අනුමැතිය හිමි වූ බව අමාත්‍යවරයා සඳහන් කළේය.
 
අමාත්‍ය ගයන්ත කරුණාතිලක මහතා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (3) පැවති කැබිනට් තීරණ දැනුම්දීමේ මාධ්‍ය හමුව අමතමිනි.